सामान्य बढ्यो महङ्गी, खाद्य तथा पेय पदार्थको सर्वाधिक

काठमाण्डौ। मूल्यबृद्धि ०.२२ प्रतिशत बिन्दुले बढेको छ । नेपाल राष्ट्र बैंकका अनुसार गत वर्षको कात्तिक मसान्तसम्म ५.३८ प्रतिशतमा रहेको उपभोक्ता मुद्रास्फीति यस वर्षको कात्तिक मसान्तसम्म बढेर ५.६० प्रतिशत पुगेको छ ।  

समीक्षा महिनामा खाद्य तथा पेय पदार्थ समूहको मुद्रास्फीति सबैभन्दा धेरै बढेको छ । राष्ट्र बैंकका अनुसार सो समूहको मुद्रास्फीति ३.१२ प्रतिशत बिन्दुले बढेको छ । गत वर्षको कात्तिम महिनासम्म ५.९८ प्रतिशत रहेको मुद्रास्फीति यस वर्षको कात्तिक महिनासम्ममा ९.१० प्रतिशत पुगेको छ ।  

त्यस्तै, गैर–खाद्य तथा सेवा समूहको मुद्रास्फीति ३.६५ प्रतिशत रहेको छ । यो समूहको मूल्यबृद्धि भने गत वर्षको तुलनामा १.३४ प्रतिशत विन्दुले घटेको छ । गत वर्षको यसै अवधिसम्म यो समूहको मुद्रास्फीति ४.९९ प्रतिशत रहेको थियो ।  

समीक्षा महिनामा खाद्य तथा पेय पदार्थ समूहअन्तर्गत तरकारी उप–समूहको वार्षिक बिन्दुगत उपभोक्ता मूल्य सूचकाङ्क ३३.९९ प्रतिशत, दाल तथा गेडागुडीको १०.७८ प्रतिशत, खाद्य तथा खाद्यजन्य पदार्थको १०.१५ प्रतिशत र घ्यू तथा तेलको ९.२९ प्रतिशतले बढेको छ भनेमरमसला उप–समूहको१.४१ प्रतिशत, चिनी तथा चिनीजन्य पदार्थको १.२८ प्रतिशत र माछा तथा मासुको ०.०२ प्रतिशतले घटेको छ ।

गैर–खाद्य तथा सेवा समूहअन्तर्गत विविध वस्तु तथा सेवा उप–समूहको वार्षिक बिन्दुगत उपभोक्ता मूल्य सूचकाङ्क १०.४१ प्रतिशत, मदिराजन्य पेय पदार्थको ६.३५ प्रतिशत, कपडाजन्य तथा जुत्ताचप्पलको ४.५७ प्रतिशत र सुर्तीजन्य पदार्थको ४.२४ प्रतिशतले बढेको छ ।