हालसम्म १९ हाइड्रो कम्पनीले गरे लाभांश घोषणा, कुनको कति ?

काठमाण्डौं । नेपाल स्टक एक्सचेञ्ज (नेप्से)मा सर्वाधिक हाइड्रोपावर कम्पनीहरु सूचीकृत छन् । हाइड्रो समूहका ९१ वटा कम्पनीहरु नेप्सेमा सूचीकृत छन् । यसकारण पनि अधिकांश लगानीकर्ताको नजरमा सेयर खरिदबिक्रीमा हाइड्रो कम्पनी बढी पर्छन् ।  

बजारमा अल्पकालिन लगानीकर्ता हाबी भएकाले सर्ट टर्म वा मिड टर्ममै लगानी गरी त्यसबाट नाफा कमाउन खोज्ने धेरै छन् । अहिले बजारमा आधारभुत पक्षमा बलिया कम्पनी जुन लगानीकर्तालाई नियमित लाभांश दिन सक्ने क्षमता भएका छन् त्यस्ता कम्पनीमा लगानीकर्ता खासै आकर्षित देखिदैनन् ।  

बजारमा लो क्याप भएका कम्पनी धेरै चल्ने ट्रेन्ड आएकाले अहिले विशेषगरी हाइड्रो सेक्टरका कम्पनी नै लगानीकर्ताको रोजाइमा पर्ने गरेको देखिन्छ । तर दीर्घकालिन लगानीका लागि हेर्ने हो भने हाइड्रो कम्पनीबाट त्यति रिटर्न पाउन नसकिने लगानीकर्ताहरुको भनाई छ ।  

नेप्सेमा सूचीकृत समूहमध्ये हाइड्रो समूहका कम्पनीहरुले तुलनात्मक रुपमा कम लाभांश दिने गरेको पाइन्छ । बैंक वित्तीय संस्था र बीमा कम्पनीहरुले जस्तो हाइड्रो कम्पनीहरुले लगानीकर्तालाई लाभांश दिएको देखिँदैन । तर पछिल्लो समय हाइड्रो कम्पनीहरुको हकप्रद आउने विषयले पनि यो सेक्टरमा लगानीकर्ताको आकर्षण बढी देखिन्छ ।  

हालसम्म १९ वटा हाइड्रोपावर कम्पनीले मात्रै गत आवको मुनाफाबाट लाभांश प्रस्ताव गरेका छन् । जसमा अधिकांशको बुकक्लोज समेत भइसकेको छ । सूचीकृत कम्पनीको संख्या ९१ वटा भएपनि हालसम्म १९ वटाले मात्रै लाभांश गरेका छन् । सूचीकृत रहेका कुल हाइड्रो कम्पनीमध्ये हालसम्म जम्मा २० प्रतिशत कम्पनीले मात्रै लगानीकर्ताका लागि प्रतिफल बाँड्ने घोषणा गरेका छन् ।  

वित्तीय अवस्था हेर्दा हाइड्रो कम्पनीहरुको अवस्था त्यति राम्रो देखिदैन । दीर्घकालिन रुपमा उपयुक्त नभएपनि सर्ट टर्म र मिड टर्मको लागि हाइड्रो कम्पनी नै उपयुक्त हुने लगानीकर्ताहरु बताउँछन् ।  

लाभांश घोषणा गरेका हाइड्रो कम्पनीहरुमध्ये सर्वाधिक माउन्टेन इनर्जी र रुरु जलविद्युत कम्पनीले लाभांश प्रस्ताव गरेका छन् । यी दुबै कम्पनीले १५.७९ प्रतिशत लाभांश घोषणा गरेका छन् । जसमा १५ प्रतिशत बोनस सेयर र कर प्रयोजनका लागि ०.७९ प्रतिशत नगद लाभांश रहेको छ । रुरु जलविद्युतको बुकक्लोज भइसकेको छ भने माउन्टेनको बुकक्लोज हुन बाँकी नै छ ।