नेप्सेको गिरावट आज पनि जारी, जानकार भन्छन्, ‘बलियो सपोर्ट जोनबाट छिट्टै रिभर्सल हुनसक्छ’

काठमाण्डौ । नेपाल स्टक एक्सचेञ्ज(नेप्से)ले आज गिरावटका साथ साताको सुरुवात गरेको छ । आज नेप्से परिसूचक ०.५२ प्रतिशत अर्थात १३.५३ अंकले घटेर २ हजार ५८३.२९ विन्दुमा झरेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.६० प्रतिशतले घटेर ४४३.०८ विन्दुमा सीमित बनेको छ । यो दिन नेप्सेमा सूचीकृत मध्ये ३१९ वटा स्क्रिप्टको ९१ लाख ८० हजार ७१८ कित्ता सेयर ४ अर्ब ५१ करोड ८३ लाख रुपैयाँभन्दा बढीको कारोबार भएको  छ ।

आजको बजारबारे नेपाल सेयरधनी संघका उपाध्यक्ष कमलराज अधिकारी भन्छन्,  ‘ठूलो अंकले घटिरहेको बजार आज सामान्य अंकले घट्नुलाई बजार क्रमशः घट्न रोकिदै गरेको भन्न सकिन्छ । यसकारण बजार एक–दुई दिनमा रिभर्सल हुन सक्छ ।’

अधिकारीले आज फर्कने प्रयास गरेको बजार अन्त्यमा सामान्य अंकले घटेको बताए । यस्तै उनले म्युचुअल फण्डहरुले लगानी बढाउँदै गरेको र सेयर कर्जा पनि बढेको कारण लगानीकर्तालाई ढुक्क भएर लगानी गर्न आग्रह गरे ।  

यस्तै यो समय भनेको सेयर खरिद गर्ने बेला भएकाले लगानीकर्ता डराउनु नपर्ने उनले दाबी गरे ।  

अर्का बजार जानकार सुमन कुमार रिजाले पनि स्मार्ट मनी बजार प्रवेश गर्दै गरेको र बजार २५८० विन्दुभन्दा तल नजाने बताए । ‘प्राविधिक रुपमा यो बलियो सपोर्ट रहेको, पुसमसान्तको दबाब सकिदै गएको र संस्थागत लगानीकर्ता बजार प्रवेश गरिरहेका कारणले छिट्टै रिभर्सल लिन सक्छ,’उनले भने ।    

यो दिन नेप्सेमा सूचीकृत १३ वटा समूहमध्ये २ वटा बाहेक अन्य सबैमा रातो पोतियो । आज उत्पादन तथा प्रशोधन समूह १.५७ प्रतिशत र हाईड्रो समूह ०.६५ प्रतिशतले बढ्यो ।  

यस्तै आज विकास बैंक समूहमा सर्वाधिक गिरावट आयो । यो समूह आज २.०५ प्रतिशतले घट्यो । बैंकिङ समूह आज ०.८७ प्रतिशत, वित्त १.४९, होटल ०.०१,लगानी १.१८,जीवन बीमा ०.८१,लघुवित्त ०.३९,म्युचुअल फण्ड ०.३५,निर्जीवन बीमा ०.८२,अन्य ०.३७ र व्यापार समूह १.३५ प्रतिशतले घट्यो ।  

धेरै कारोबार गर्ने कम्पनीहरु

यो दिन रिभर फल्स पावरको सर्वाधिक सेयर कारोबार भयो । आज यो कम्पनीको २२ करोड ३ लाख बढीको कारोबार भयो । जानकी फाइनान्सको पनि आज १२ करोड ९९ लाख,पिपुल्स पावरको ८ करोड २९ लाख,नेपाल फाइनान्सको ८ करोड २९ लाख र भूगोल इनर्जीको ७ करोड ५४ लाख बढीको सेयर कारोबार भयो ।    

धरै कमाउने र गुमाउने कम्पनीहरु

आज नेप्सेमा कारोबार भएका ५ वटा कम्पनीको सेयरमूल्यमा अपर सर्किट लाग्यो । आज सपोर्ट माइक्रोफाइनान्स,बाराही हाईड्रोपावर,न्यादी हाईड्रोपावर,सुपर मादि हाईड्रोपावर र पिपुल्स पावरको सेयरमूल्यमा अपर सर्किट लाग्यो ।  

मानुषी लघुवित्तको सेयरमूल्य पनि आज ७.८० प्रतिशत,घोराही सिमेन्टको ७.२३ र चिरख्वा हाईडोको सेयरमूल्य ६.३४ प्रतिशतले बढ्यो ।  

यो दिन सप्तकोशी डेभलपमेन्ट बैंकको सेयरमूल्य सर्वाधिक घट्यो । यो कम्पनीको सेयरमूल्य आज ६.४० प्रतिशतले घट्यो । माया खोला हाईड्रोको सेयरमूल्य आज ६.१२ प्रतिशत,गरिमा विकास बैंकको सेयरमूल्य ४.५२ र नारायणी डेभलपमेन्ट बैंकको सेयरमूल्य ४.३८ प्रतिशतले घट्यो ।