पूँजी बजार नियामकका प्रमुखहरुको नियुक्तीमा बिचौलिया हाबी, नेप्सेमा कार्की पुनः दोहोरिन लबिङ गर्दै

काठमाण्डौं । लामो समयको रस्साकस्सी पछि धितोपत्र बोर्डमा अध्यक्ष नियुक्ति भएको छ । सरकारले धितोपत्र बोर्डको अध्यक्ष पद रिक्त रहेको लामो समयपछि गत मंसिर १० गते सन्तोष नारायण क्षेष्ठलाई अध्यक्ष नियुक्त गरेको थियो ।  

बोर्ड अध्यक्ष नियुक्तीका लागि करिब एक वर्ष लाग्नुमा अरु कुनै कारण नभएर बिचौलिया र व्यापारिहरुको स्वार्थ नै प्रमुख कारण थियो । यसैगरि, अर्को नियामक निकाय नेपाल स्टक एक्सचेञ्जमा पनि केही समय पछि हालका नेप्सेका सीइओ कृष्ण बहादुर कार्कीको कार्यकाल समाप्त हुँदैछ । सीडीएसीको प्रमुख कार्यकारी अधिकृतको पद गत भदौ ७ गतेदेखि रिक्त भएको छ । तर नेप्सेले हालसम्म पनि नयाँ सीइओ नियुक्ति गर्न सकेको छैन । यसको मुख्य कारण पनि स्वार्थ समूहकै स्वार्थ हो ।  

सीडीएसी भनेको सेयर कारोबारमा राफसाफको लागि महत्वपूर्ण निकाय हो । यहाँ पनि आफू अनुकुलको व्यक्ति नभएमा कतिपय स्वार्थ बाँझिने काम हुन नसक्ने देखेर नै पाँच महिनादेखि कुनै पनि व्यक्ति नियुक्ती हुन सकेको छैन ।  

स्रोतले दिएको जानकारी अनुसार अब तीन वटै नियामक निकायमा एउटै समूहले आफू अनुकलको व्यक्ति नियुक्ती गर्ने तयारी गरेको बुझिएको छ । खासगरि नयाँ स्टक एक्सचेञ्ज आउँदै गर्दा बिचौलिया समूहले तीन वटै नियामक निकायहरुमा आफू अनुकुल व्यक्ति नियुक्त गर्ने मनसायले नै सीडीएसीमा कुनैपनि नियुक्ति नभएको हो ।  

स्रोतकै दाबी अनुसार नेपाल स्टक एक्सचेञ्जमा हालका सीइओ कार्कीले नै पुनः दोहोरिन लबिङ थालेका छन् । कार्कीले यसअघि धितोपत्र बोर्डको अध्यक्षको लागि पटक–पटक प्रयास गर्दा पनि असफल भएपछि पुनः नेप्सेमा दोहोरिने प्रयास गरेका हुन् । यद्यपी कार्कीले आफ्नो कार्यकालमा पूँजीबजार सुधारका विषयमा कुनै विशेष काम गरेर लगानीकर्ताको मन जित्न नसकेको लगानीकर्ताहरुले आरोप लगाउँदै आएका छन् ।