सुनको मूल्य ११ डलरले बढ्यो, प्रतिऔंस कति पुग्यो भाउ ?

काठमाण्डौ । केही दिनयता खासै उतारथढाव नआएको सुनको मूल्य आज भने वृद्धि भएको छ । आज अन्तराष्ट्रिय बजारमा सुनको मूल्य ११.३५ डलरले बढेको छ ।  

यो वृद्धिसँगै सुनको मूल्य प्रतिऔंस २ हजार ६२६ डलरमा कारोबार भ्रईरहेको छ । डलर केही कमजोर बन्दा र बढ्दो विश्वक भू–राजनीतिक तनाबका कारण आज सुनको मूल्यमा वृद्धि देखिएको हो । यसका साथै लगानीकर्ताको नजर अमेरिकी केन्द्रीय बैंकले सन् २०२५ मा अपनाउने रणनीति र डोनाल्ड ट्रम्पको भन्सार शुल्कमाथि रहेको छ । यी तत्वले आगामी वर्ष सुनको मूल्यलाई निर्धारण गर्ने विज्ञले बताएका छन् ।  

यो वर्ष सुनको मूल्य २७ प्रतिशतले बढिसकेको छ र यो सन् २०१० पछिकै उच्च वृद्धितर्फ उन्मुख भएको छ । यो वर्ष सुनको मूल्यले नयाँ–नयाँ उचाई लिनुमा अमेरिकी केन्द्रीय बैंकले गरेको ब्याजदर कटौती र विश्वमा बढ्दो भू–राजनीतिक संकट मुख्य कारण हुन् । सुनलाई यस्तो संकटको बेला सुरक्षित लगानीको रुपमा हेर्ने गरिन्छ ।  

आज चाँदीको मूल्य पनि बढेको छ । चाँदीको मूल्य ०.०३ डलरले बढेर प्रतिऔंस २९.७१ डलर पुगेको छ ।