ग्राउण्ड जिरोका लगानीकर्तामा लघुवित्तको चर्चा, भन्छन्, ‘बजारमा माहोल फेरिदै, अपरेटर बन्यो कि फस्यो’

काठमाण्डौ । सधैंको साता जस्तै आज पनि हामीले नियमित स्तम्भ ‘ग्राउण्ड जिरो’लाई निरन्तरता दिएका छौं । यसै सिलसिलामा आज हामीले लगानीकर्ताहरुको बिचार बुझ्ने क्रममा अनामनगर आसपासका ब्रोकर हाउसहरुमा पुगेर लगानीकर्ताहरुको बिचार बुझ्ने प्रयास गरेका छौं । पुसको चिसोसँगै सेलाएको सेयर बजारमा लगानीकर्ताहरु नाफा घाटा हिसाब गरिरहेका भेटिन्थे ।  

आज हामीले सबै भन्दा पहिले अनामनगरमा रहेको दीपशिखा धितोपत्र (स्टक ब्रोकर नम्बर ३८) बाट हाम्रो स्तम्भको सुरुवात गर्यौं । बिहान ११ बज्दा नबज्दै हामी त्यहाँ पुग्दा लगानीकर्ताको उपस्थिति खासै थिएन । आज पहिलो प्रहरबाट नै बजार सामान्य अंकले घटेको थियो । ब्रोकर हाउस भने सुनसान जस्तै थियो । यस ब्रोकरका सुरक्षा गार्डले हिजोआज बजार घटेको र चिसो बढेका कारण ब्रोकर हाउसमा लगानीकर्ता आउन छाडेका बताए । हामीले केही समय ब्रोकर सञ्चालकसँग पनि बजारको विषयमा जिज्ञासा राख्यौं । कारोबारमा ब्यस्त रहेका यस ब्रोकरका सञ्चालकले पनि बजारको विषयमा स्पष्ट केही बताउन सकेनन् । मध्यान्हको १२ बज्दा पनि खासै लगानीकर्ता नआए पछि हामीले अर्को ब्रोकर हाउसमा जाने निधो गर्यौं । बजार एकपटक माथि जान प्रयास गरेर फेरी घट्न थालेको थियो ।  

यहाँबाट हामी अनामनगरमा नै रहेको भोले गणेश सेक्यूरिटिज (स्टक ब्रोकर नम्बर ६१) मा पुग्यौं । यस ब्रोकरमा केही महिला र पूरुष लगानीकर्ता कारोबारमा मस्त भेटिन्थे । यतिकैमा एक महिला लगानीकर्ताले भनिन्, ‘लौ माइक्रोफाइनान्स पो बढ्न थाले । उनीसँगै बसेका एक लगानीकर्ताले भने, ‘त्यही त शीर्ष बढ्नेमा त सबै माइक्रा फाइनान्स पो छन् । विकास बैंक घटेका छन्’ उनले थप्दै भने, ‘मैले धन्न सिन्धु विकास बैंक बेचेछु । नत्र आजत बर्बादै हुने रहेछ ।’

यसै ब्रोकरमा भेटिएका एक लगानीकर्ताले आफूसँग धेरै नभए पनि एक सय कित्ता कर्णाली विकास बैंकको सेयर भएको बताए । उनले ठट्यौलि पारामा केही विकास बैंक घटेको प्रति इंगित गर्दै भने, ‘धन्न कर्णाली विकास बैंकको सेयर त छानेरै किनिएछ । अरु बैंकको सेयर घटेको घट्यै छन् । कर्णाली विकास बैंक त घट्ला भन्ने पीरै भएन।’ उनको यस्तो कुरा सुनेर ब्रोकरहाउमा एकछिन् हाँसोको फोहोरा नै छुट्यो । ब्रोकरहाउसमा यस्तै गलफति चल्दै थिए ।

केही समय व्यतित गरेपछि यहाँबाट हामी भिजन सेक्यूरिटिज (स्टक ब्रोकर नम्बर ३४) मा पुग्यौं । यहाँ भने लगानीकर्ताको उपस्थिति राम्रै थियो । यहाँ भेटिएका एक लगानीकर्ताले भने, ‘यसपाली अपरेटर बन्यो कि फस्यो । ठूलो भनिएको ब्रोकर, नासा पनि फसेको फस्यै छ । अहिले बजारमा उल्टो भएको छ । पहिले नाम चलेका खेलाडीको स्टकमा पोजेटिभ सर्किट लाग्थ्यो । आज त उल्टो भएको छ ।’

उनीसँगै बसेक एक लगानीकर्ताले भने, ‘गरिमा विकास बैंकले त कमसल खालका बैंकको सेयर धितो कर्जाबाट हटाउन भनेको छ रे ! यस्ता बैंक राखेर सेयर धितो दिएको भए सेटलमेन्ट गर्न र अब लिस्टबाट हटाउन भनिएको छ रे । आज सिन्धु बिकास बैंक, नारायणी, सप्तकोशी डेभलपमेन्ट बैंकमा लोअर सर्किट लाग्नुको कारण पनि त्यही हो । अब बैंकले धितो नराखेपछि यी सेयर के होलान् भन्न गाह्रो छ,’ ती लगानीकर्ताले लामो सास फेर्दै भने ।  

ब्रोकर हाउसमा यस्तै गलफति चल्दै थियो । यहाँबाट हामी आर्यतारा सेक्यूरिटिज (स्टक ब्रोकर नम्बर ५७) मा पुग्यौं । यस ब्रोकरहाउसमा पनि लगानीकर्ताहरुको उपस्थिति खासै थिएन । उपस्थित लगानीकर्ताहरु पनि निष्क्रिय देखिन्थे । बजार एकोहोरो घटिरहेको थियो । लगानीकर्ताहरु बजार फर्कने झिनो आशा बोकेर डिस्प्लेमा नजर डुलाइ रहेको भेटिन्थे । यस बेलासम्म दिनको ३ बज्दै थियो । हामीले यो साताको लागि हाम्रो स्तम्भलाई यही बिट मार्ने निधो गर्यौं ।