यी ६ कम्पनीको लाभांश सुरक्षित गर्ने आज अन्तिम दिन

काठमाण्डौ । नेपाल स्टक एक्सचेञ्ज(नेप्से)मा सूचीकृत ६ वटा कम्पनीको लाभांश सुरक्षित गर्ने आज अन्तिम दिन रहेको छ । आज लक्ष्मी सनराइज बैंक, सांग्रिला डेभलपमेन्ट बैंक, आइसिएफसि फाइनान्स,शिवम् सिमेन्ट,डिप्रोक्स लघुवित्त र साना किसान विकास लघुवित्तको लाभांश सुरक्षित गर्ने अन्तिम दिन रहेको हो ।  

यी कम्पनीहरुले लाभांश वितरण तथा साधारण सभा प्रयोजनका लागि पुस १७ गते बुक क्लोज गदैछन् । यसर्थ आजसम्म नेप्सेमा कारोबार भई कायम भएका सेयरधनीहरु मात्रै यी कम्पनीद्वारा प्रस्तावित लाभांश पाउन र सभामा सहभागी हुनका लागि योग्य हुनेछन् ।  

लक्ष्मी सनराइज बैंकले हाल कायम चुक्तापूँजीको ५ प्रतिशत बोनस सेयर र ०.२६ प्रतिशत नगद लाभांश गरी कुल ५.२६ प्रतिशत लाभांश वितरणको प्रस्ताव गरेको छ । बैंकको २४ औं साधारण सभा पुस २४ गते काठमाण्डौको कमलपोखरीमा रहेको अग्रवाल भवनमा बिहान ११ बजेदेखि आयोजना हुनेछ । उक्त सभाबाट लाभांशको प्रस्ताव पारित हुनेछ ।  

सांग्रिला डेभलपमेन्ट बैंकले गत आवका लागि सेयरधनीहरुलाई ३.६५ प्रतिशत बोनस सेयर र ०.१९ प्रतिशत नगद लाभांश गरी कुल ३.८४ प्रतिशत लाभांश वितरणको प्रस्ताव गरेको छ । यो लाभांश पुस २९ गते काठमाण्डौको बालुवाटरमा रहेको आम्रपाली ब्याङक्वेटमा बिहान साढे १० बजेदेखि सुरु हुने साधारण सभाबाट पारित गरी वितरण गरिनेछ ।  

आइसिएफसि फाइनान्सले पनि आफ्ना सेयरधनीहरुलाई ५.२६३२ प्रतिशत नगद लाभांश(कर प्रयोजनका लागि समेत)को घोषणा गरेको छ । लाभांश पारितको मुख्य अजेण्डासहित कम्पनीको २१ औं साधारण पुस २९ गते  काठमाण्डौको बौद्रमा रहेको बौद्ध हेरिटेजमा बिहान १० बजेदेखि आयोजना हुन् तय भएको छ ।  

शिवम् सिमेन्टले  आव २०८०÷८१ का लागि हाल कायम चुक्तापूँजीको ८.५५ प्रतिशत बोनस सेयर र कर प्रयोजनका लागि ०.४५ प्रतिशत नगद लाभांश गरी कुल ९ प्रतिशत लाभांश दिने निर्णय गरेको छ । लाभांश पारित गर्न कम्पनीको साधारण सभा पुस २९ गते काठमाण्डौको राष्ट्रिय सभा गृह सिटी हलमा बिहान ९ बजेदेखि आयोजना हुनेछ ।  

डिप्रोक्स लघुवित्तले गत आवका लागि ९.५० प्रतिशत बोनस सेयर र ०.५० प्रतिशत नगद लाभांश(कर प्रयोजनका लागि) गरी कुल १० प्रतिशत लाभांश वितरणको प्रस्ताव गरेको छ । यो लाभांश गत पुस पुस २६ गते चितवनको सौराहमा रहेको होटल सेभेन स्टारमा आयोजना हुने २३ औं साधारण सभाबाट पारित गरी वितरण गरिनेछ ।  

यस्तै साना किसान विकास लघुवित्तले गत आवको वितरणयोग्य मुनाफाबाट १३.३० प्रतिशत बोनस सेयर र ०.७० प्रतिशत नगद लाभांश गरी कुल १४ प्रतिशत लाभांश घोषणा गरेको छ । संस्थाको २३ औं वार्षिक साधारण सभा पुस २३ गते आयोजना हुनेछ ।