अमेरिकामा लागेको आगलागीका कारण बीमा कम्पनीलाई ८ देखि २० अर्ब डलर घाटा हुने अनुमान

काठमाण्डौ । अमेरिकाको दक्षिण क्यालिफोर्निया मा लागेको भिषण आगलागीका कारण बीमा क्षेत्रमा भारी मात्रामा दाबी पर्ने भएको छ । हालसम्म पनि आगलागी नियन्त्रणमा आउन नसक्दा बीमाको दाबी रकम झन झनै बढ्दै गएको छ ।  

आगलागीका कारण हालसम्म बीमा कम्पनीहरुरलाई ८ देखि २० अर्ब डलरसम्म घाटा लागेको जनाइएको छ । बिहिबार बिहानसम्मको आँकडाअनुसार आगलागीमा परी १३ सय वटा भौतिक संरचनाहरु ध्वस्त भएका छन् ।

यद्यपी प्यासेफिक टाइम्सले भने २ हजार भन्दा बढी संरचनाहरु ध्वस्त भएको जनाएको छ । यस्तै हजारौं संरचनाहरु उच्च जोखिममा रहेको जनाइएको छ ।  

हालसम्म आगलागी ४५ वर्ग माइल क्षेत्रफलमा फैलिएको छ र १ लाख ८० हजारलाई सुरक्षित स्थानमा लगिएको छ । आगलागीमा परी हालसम्म ५ जनाको मृत्यु भईसकेको छ ।  

तीव्र वेगमा चलिरहेको हावाका कारण आगो झनै फैलिरहेको छ । एक्युवेदरले बुधबार गरेको प्रारम्भिक प्रक्षेपण अनुसार आगलागीका कारण ५२ अर्ब देखि ५७ अर्ब डलरसम्म आर्थिक क्षति पुगेको छ । बिहिबार भने एक्युवेदरले यो आँकडा १३५ अर्ब देखि १५० अर्ब डलरसम्म पुगेको जनाएको छ ।