सामान्य अंकले घट्यो नेप्से, जानकार भन्छन्, ‘फाइनान्स र लो क्याप कम्पनीमा गिरावट आउनु मुख्य कारण’

काठमाण्डौ । साताको पहिलो कारोबार दिन आज नेपाल स्टक एक्सचेञ्च(नेप्से) सामान्य अंकले घटेको छ । आज नेप्से परिसूचक ०.३९ प्रतिशत अर्थात १०.४१ अंकले घटेर २ हजार ६४३.९३ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.७१ प्रतिशतले घटेर ४४३.६० विन्दुमा खुम्चिएको छ । यो दिन नेप्सेमा सूचीकृत मध्ये ३१८ वटा स्क्रिप्टको १ करोड ५७ लाख २० हजार ३६७ कित्ता सेयर ९ अर्ब १२ करोड ८६ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार उपेन्द्र पाठक भन्छन्,  ‘आज बजार घटेपनि भोल्युम भने बढेको छ । यसले बजारमा लगानीकर्ता सक्रिय भएको मान्न सकिन्छ ।’

पाठकले बजारमा चल्नुपर्ने खालका कम्पनीहरु नचलेको र ठूला पूँजी भएका कम्पनीको सेयरमूल्य बढ्न ठूलै लगानी भित्रिन आवश्यक रहेको बताए । ‘अहिले लगानीकर्ता मौद्रिक नीतिको समीक्षाको पखाईमा रहेका देखिन्छन् । लगानीकर्ताले अपेक्षा गरेअनुसार नीतिमा परिवर्तन भएमा लार्ज क्याप भएका कम्पनीहरु चल्नेछन्,’ उनले भने ।  

अर्का बजार जानकार निमानन्द कंडेलले पनि आजको बजार घट्नुमा फाइनान्स सेक्टर र लो क्याप कम्पनीमा गिरावट आउनु मुख्य कारण भएको बताए । ‘यद्यपी आजको बजारको कारोबारलाई नियाल्ने हो भने राम्रो मात्रामा आज कारोबार भएको छ । बजार घट्नु पर्ने कुनै पनि कारण छैन । सबै कुरा सकारात्मक भएका कारण लगानीकर्ताको मनोबल बढ्दै गएको देखिन्छ,’उनले भने ।  

यस्तै उनले लगानीकर्ताद्वारा पूँजी बजारका लागि गरिएको माग पूरा भए बजारले लय समात्ने बताए ।      

यो दिन नेप्सेमा सूचीकृत १३ वटा समूहमध्ये ५ वटा समूहमा हरियाली छायो भने अन्य ८ वटा समूहमा रातो पोतियो । आज लघुवित्त समूह सर्वाधिक अर्थात ०.७५ प्रतिशतले बढ्यो । विकास बैंक समूह पनि आज ०.५९ प्रतिशत,हाईड्रो ०.५४,म्युचुअल फण्ड ०.४८ र अन्य समूह ०.०३ प्रतिशतले बढ्यो ।  

फाइनान्स समूह आज सर्वाधिक घट्यो । यो समूह आज ४.७६ प्रतिशतले घट्यो । यस्तै, बैंकिङ समूह ०.८९ प्रतिशत,होटल ०.२७,लगानी ०.५०,जीवन बीमा ०.६१,उत्पादन तथा प्रशोधन १.६६,निर्जीवन बीमा ०.६७ र व्यापार समूह ०.७५ प्रतिशतले घट्यो ।  

धेरै कारोबार गर्ने कम्पनीहरु

यो दिन सप्तकोशी डेभलपमेन्ट बैंकको सर्वाधिक सेयर कारोबार भयो । आज यो कम्पनीको ३९ करोड ५३ लाख बढीको कारोबार भयो । नेपाल पुनर्बीमा कम्पनीको आज ३८ करोड ४२ लाख,एनआरएन इन्फ्रास्ट्रक्चरको ३५ करोड ८७ लाख,सिन्धु विकास बैंकको २९ करोड २० लाख र सिईडिबी होल्डिङको २५ करोड ५६ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ४ वटा कम्पनीको सेयरमूल्यमा अपर सर्किट लाग्यो । आज उपकार लघुवित्त,माथिल्लेो मैलुङ खोला जलविद्युत,कर्पोरेट डेभलपमेन्ट बैंक र आरम्भ चौतारी लघुवित्तको सेयरमूल्यमा अपर सर्किट लाग्यो ।  

यस्तै आज सिक्लेस हाईड्रोपावरको सेयरमूल्य ८.६० प्रतिशत,सामुदायिक लघुवित्तको ७.३८ र मेन्छियाम हाईड्रोको सेयरमूल्य ६.७८ प्रतिशतले बढ्यो ।  

यो दिन ४ वटा कम्पनीको सेयरमूल्यमा लोअर सर्किट लाग्यो । बोटलर्स नेपाल(बालाजु),११ प्रतिशत एनआईसी  एशिया डिबेञ्चर८२८३,दोल्ती पावर र जानकी फाइनान्सको सेयरमूल्यमा लोअर सर्किट लाग्यो ।