सूर्यज्योति लाइफको नाफा सामान्य बढ्यो, ईपीएस ७.८३ रुपैयाँ

काठमाण्डौ । सूर्यज्योति लाइफ इन्स्योरेन्स कम्पनी लिमिटेडले चालु आवको दोस्रो त्रैमाससम्मको अप्िरष्कृत वित्तीय विवरण सार्वजनिक गरेको छ । जसअनुसार कम्पनीले १९ करोड ६१ लाख रुपैयाँ खुद नाफा कमाएको छ । यो रकम अघिल्लो आवको सोही अवधिको तुलनामा ३.३७ प्रतिशतले बढी हो ।  

अघिल्लो आवको दोस्रो त्रैमाससम्म कम्पनीले १८ करोड ९७ लाख रुपैयाँ खुद नाफा आर्जन गरेको थियो ।  

समीक्षा अवधिसम्म कम्पनीको खुद बीमाशुल्क आर्जन पनि सामान्य बढेको छ । यो अवधिमा कम्पनीको खुद बीमाशुल्क आर्जन १९.८३ प्रतिशतले बढेको छ । दोस्रो त्रैमाससम्म कम्पनीले ४ अर्ब ९८ करोड रुपैयाँबराबरको खुद बीमाशुल्क आर्जन गरेको छ । अघिल्लो आवको सोही अवधिसम्म भने कम्पनीले ४ अर्ब १५ करोड रुपैयाँबराबरको खुद बीमाशुल्क आर्जन गरेको थियो ।  

कम्पनीको खुद दाबी भुक्तानी पनि वृद्धि भएको छ । अघिल्लो आवसम्म ४ अर्ब ६१ करोड रुपैयाँबराबर  खुद दाबी भुक्तानी गरेको कम्पनीले समीक्षा अवधिसम्म भने ५ अर्ब ६३ करोड रुपैयाँबराबरको दाबी भुक्तानी गरेको छ । कम्पनीको कुल खर्च ५ अर्ब ५४ करोडबाट बढेर ६ अर्ब ६४ करोड रुपैयाँ पुगेको छ ।  

कम्पनीले लगानी तथा कर्जाबाट १ अर्ब ७६ करोड रुपैयाँ आर्जन गरेको छ । कम्पनीको अन्य प्रत्यक्ष आम्दानी ४ करोड ३ लाख रुपैयाँ रहेको छ ।  

कम्पनीको रिटेन्ड अर्निङमा गिरावट आएको छ । अघिल्लो आवमा १ अर्ब १५ करोड रुपैयाँ रहेको रिटेन्ड अर्निङ घटेर ३२ करोड ८२ लाख रुपैयाँमा सीमित बनेको छ । कम्पनीको महाविपत्ती कोषको आकार ३८ करोड ६९ लाख रुपैयाँबराबरको रहेको छ ।  

समीक्षा अवधिसम्म कम्पनीको प्रतिसेयर आम्दानी(ईपीएस) ७.८३ रुपैयाँ, प्रतिसेयर नेटवर्थ १२३.४४ रुपैयाँ,प्रतिसेयर कुल सम्पत्तिको मूल्य ९००.७३ रुपैयाँ र पीई अनुपात ५६.७३ गुणा कायम भएको छ ।