जीवन बीमा कम्पनीहरुको विभिन्न क्षेत्रमा रु.७ खर्ब लगानी, सेयरबजारमा १०८% ले वृद्धि

काठमाण्डौ । जीवन बीमा कम्पनीहरुको लगानी १३ प्रतिशतले बढेको छ । नेपाल बीमा प्राधिकरणका अनुसार चालु आवको दोस्रो त्रैमाससम्म जीवन बीमा कम्पनीहरले विभिन्न क्षेत्रमा ७ खर्ब ३ अर्ब ३४ करोड रुपैयाँ लगानी गरेका छन् ।  

गत आवको सो अवधिसम्म जीवन बीमा कम्पनीहरुले विभिन्न क्षेत्रमा ६ खर्ब २२ अर्ब ४१  करोड रुपैयाँ लगानी गरेका थिए ।  

प्राधिकरणका अनुसार जीवन बीमकहरुले हाल दर्जनौ क्षेत्रमा लगानी गर्दै आएका छन् । कम्पनीहरुले सर्वाधिक ५ खर्ब ६१ अर्ब २१ करोड रुपैयाँ बैंक तथा वित्तीय संस्थाहरुको मुद्दती निक्षेपमा लगानी गरेका छन् ।  

यो रकम कुल लगानीको झण्डै ८० प्रतिशत रकम हो । बीमा कम्पनीहरु अधिकांश रकम बैंक तथा वित्तीय संस्थाको मुद्दती निक्षेपमा नै लगानी होम्मिएका छन् । अन्य सेक्टरमा जस्तो जोखिम नहुने र थोरै प्रतिशत भएपनि रिटर्न पाउने ग्योरेन्टी भएको हुँदा बीमा कम्पनीहरु ८० प्रतिशत रकम मुद्दती निक्षेपमा राख्न बाध्य पनि छन् ।  

जीवन बीमा कम्पनीहरुले मुद्दतीमा राखेको यो रकम गत आवको सोही अवधिसम्मको तुलनामा १६.८२ प्रतिशत बढी हो । गत आवको सोही अवधिसम्म कम्पनीहरुले मुद्दतीमा ४ खर्ब ८० अर्ब ३९ करोड रुपैयाँ राखेका थिए ।  

पछिल्लो समय बीमा कम्पनीहरु अन्य सेक्टरमा पनि विस्तारै लगानीको दायरा बढाउँदै लगेका छन् । बीमा कम्पनीहरुको कृषि, जलविद्युत, शिक्षा र स्वास्थ्य क्षेत्रमा कुल ८ अर्ब ९८ करोड रुपैयाँ लगानी रहेको छ । यो रकम पनि गत आवको तुलनामा १२.३८ प्रतिशत बढी हो ।  

गत आवको सोही अवधिसम्म बीमकहरुको यो क्षेत्रमा ७ अर्ब ९९ करोड रुपैयाँ लगानी रहेको थियो । 

जीवन बीमा कम्पनीहरुले दोस्रो त्रैमाससम्म आइपुग्दा सूचीकृत पब्लिक कम्पनीको सेयर (सेयरबजार)मा २५ अर्ब ७७ करोड रुपैयाँ लगानी गरेका छन् । यो रकम गत आवको सोही अवधिसम्मको तुलनामा १०८.३५ प्रतिशत बढी हो । गत आवको दोस्रो त्रैमाससम्म जीवन बीमकको सेयरबजारमा १२ अर्ब ३६ करोड ८९ लाख रुपैयाँ लगानी रहेको थियो ।