५१.६९% ले बढ्यो रिलायबल नेपाल लाइफको नाफा, बीमाशुल्क आर्जन र ईपीएस कति ?

काठमाण्डौ । रिलायबल नेपाल लाइफ इन्स्योरेन्स कम्पनी लिमिटेडले चालु आव २०८१÷८२ को दोस्रो त्रैमाससम्मको अपरिष्कृत वित्तीय विवरण सार्वजनिक गरेको छ । जसअनुसार कम्पनीको खुद नाफा ५१.६९ प्रतिशतले बढेको छ । कम्पनीले समीक्षा अवधिसम्म ३५ करोड ३ लाख रुपैयाँ नाफा कमाएको छ ।  

अघिल्लो आवको सोहि अवधिमा कम्पनीको खुद नाफा २३ करोड ९ हजार रुपैयाँमा सीमित थियो । कम्पनीले समीक्षा अवधिसम्म २ अर्ब २१ करोड बीमाशुल्क संकलन गरेको छ । जुन आघल्लो आवको तुलनामा २६.५९ प्रतिशतले बढी हो । अघिल्लो आवको समीक्षा अवधिसम्म कम्पनीले १ अर्ब ७५ करोड रुपैयाँबराबरको बीमाशुल्क अंकलन गरेको थियो । कम्पनीले लगानी कर्जा तथा अन्यबाट हुने आम्दानीबापत ६९ करोड १९ लाख रुपैयाँ कमाएको छ ।  

यो अवधिमा कम्पनीको कुल खर्च २३.५४ प्रतिशतले बढ्दै २ अर्ब ६९ करोड पुगेको छ । समीक्षा अवधिसम्म कम्पनीले १ लाख ४२ हजार ५७० वटा पोलिसी जारी गरेको छ । कम्पनीले यो अवधिसम्म २ अर्ब १० करोड रुपैयाँ दाबी भुक्तानी गरेको छ । अघिल्लो आवमा भने कम्पनीले १ अर्ब ६३ करोड रुपैयाँबराबरको खुद दाबी भुक्तानी गरेको थियो ।  

कम्पनीको रिटेन्ड अर्निङ ७२ करोड ९५ लाख र सेयर प्रिमियम १ अर्ब ७५ करोड रुपैयाँ रहेको छ । यस्तै कम्पनीको महाविपत्ती कोषको आकार १६ करोड ३२ लाख रुपैयाँ रहेको छ ।  

कम्पनीको प्रतिसेयर आम्दानी १५.१० रुपैयाँ, प्रतिसेयर नेटवर्थ १६६.६६ रुपैयाँ, मूल्य आम्दानी अनुपात ३३.७० र प्रतिसेयर कुल सम्पत्तिको मूल्य ४२५.०६ रुपैयाँ कायम भएको छ ।