नेप्सेको चार्टमा ‘ड्रागन फ्लाई डोजी स्टार’, के होला अब बजार ?

काठमाण्डौ । नेप्सको दैनिक चार्टमा ‘ड्रागन फ्लाई डोजी’ बनेको छ । सेयर तथा सूचकको सुरु, अन्तिम र अधिकतम मूल्य एउटै भई न्यूनतम मूल्य कम भएर तल लामो धागो देखिएको मैनबत्तीलाई ‘ड्रागन फ्लाई डोजी’ भनिन्छ । यो मैनबत्ती अंग्रेजी अक्षरको ‘टी’ आकारको हुन्छ ।  

यसले दिनभरको कारोबार समय बिक्रेताले नियन्त्रण लिएको र कारोबारको अन्तिम समयमा क्रेताले बजारलाई माथि धकेली पुनः सुरुको मूल्य तथा सूचकमा पुर्याएको हुन्छ । यो मैनबत्तीले तलको लामो धागोले बजारमा क्रेताको चाप रहेको कुरालाई संकेत गर्छ । माथिको छोटो धागोले बिक्रेताको अझै कायम रहेको बुझिन्छ ।  

लामो समयको घट्दो ट्रेन्डमा यस्तो आकृति देखा परेमा बजारले बुलिस ट्रेन्डमा जाने संकेत गर्छ । यसअघि यस्तै आकृति बन्दा बजार बुलिस बनेको थियो ।  

यसविपरीत यदि लामो समयको बढ्दो ट्रेन्डमा यस्तो आकृति देखा परेमा भने बजार बियरिसमा जाने संकेत गर्छ । यद्यपी आज बनेको यस्तो आकृतिले बजारको अबस्था यहि नै हुन्छ भन्ने कुनै निश्चितता देखिदैन । कारोबार तथा भोल्यमुबाट नियाल्दा अघिल्लो दिनको तुलनामा आज करिब २ अर्ब कम कारोबार भएको छ । यसले बजारमा नाफा बुक भएको पनि देखिन्छ । विभिन्न इन्डिकेटरहरुबाट नियाल्दा बजार बुलिस नै छ । यसकारण हालको बजारमा सामान्य करेक्सन भएको खण्डमा पनि त्यो बजार मजबुत नै हुँदै गएको मान्न सकिन्छ ।  

नोटः सेयर बजारमा लगानी जोखिमपूर्ण हुन्छ । यो प्राविधिक विश्लेषण कारोबारका लागि सिफारिस भने होइन ।