धितोपत्र बोर्डको बैठक आज बस्दै, अन्तिम १५ मिनेटको भारित औषत मूल्यको विषयमा छलफल हुने

काठमाण्डौ । पूँजीबजारमा कारोबारको अन्तिम १५ मिनेटको विषयमा आज बस्न लागेको धितोपत्र बोर्डको बैठकमा छलफल हुने भएको छ । नेपाल स्टक एक्सचेञ्ज(नेप्से)ले अघिल्लो साता एक विनियमावलीलाई परिमार्जन गर्दै अन्तिम १५ मिनेटको मूल्यलाई भारित औषत मूल्य निर्धारण गर्ने पस्ताव धितोपत्रबोर्डमा पठाएको थियो ।  

धितोपत्र बोर्डका कार्यकारी निर्देशक बिनय देब आचार्यले आज बस्ने बोर्ड बैठकमा यस विषयमा छलफल हुने जानकारी दिए । उनले भने, ‘यो विषय नेप्सेबाट आएको छ । आजसम्म यस विषयमा कुनैपनि छलफल भएको छैन, तर आज बस्ने बोर्ड बैठकमा यस विषयमा छलफल हुनसक्छ,’ उनले थप्दै भने, ‘बोर्डले के निर्णय गर्छ त्यही अनुसार अगाडी प्रक्रिया अगाडी बढ्ने हो । ’

नेप्सेले १५ मिनेटको मूल्यलाई भारित औषत मूल्य निर्धारण गर्ने भएपछि बजारमा लगानीकर्ताहरुमा केही अन्यौलता पनि देखिएको छ । केहीले यो व्यवस्थाको समर्थन पनि गरेका छन् भने केहीले भर्खरै बामे सर्दै गरेको बजारमा अनेक फण्डा ल्याएर बजार घटाउन नियामक नै लागेको प्रतिक्रिया पनि दिएका छन् ।

यसै विषयमा नेप्सेका कायममुकायम(कामु) प्रमुख कार्यकारी अधिकृत निरञ्जन फुयाँलले बिजशालासंग कुरा गर्दै नेप्सेले यस विषयलाई नेप्सेको बोर्डबाट पास गरेर धितोपत्र बोर्डमा पठाएको जानकारी दिए । फुयाँलले अन्तिम १५ मिनेटको मूल्यलाई भारित औषत मुल्य कायम गर्ने विषय खासै ठूलो विषय नभएको र यस अघि पनि सेबोनसँग एकपटक छलफल भएको जानकारी दिए । उनले भने, ‘मैले बुझेसम्म भारतको बजारमा यो लागू भएको छ । तर उच्च तरलता भएको बजारमा भने यो सम्भब देखिदैन । हामीले पास गरेर धितोपत्र बोर्ड पठाएका छौ, अब सेबोनले कसरी बुझ्छ ? त्यसैमा भर पर्छ ।’