म्युचुअल फण्डहरुको नाफा ३९.५०% ले बढ्यो, सबैको न्याभ वृद्धि

काठमाण्डौ । म्युचुअल फण्डहरुको नाफामा सुधार देखिएको छ । चालु आवको माघ मसान्तसम्म म्युचुअल फण्डहरुले ३ अर्ब ८८ करोड ५० लाख रुपैयाँ नाफा कमाएका छन् ।  

यो नाफा अघिल्लो महिनाको तुलनामा ३९.५० प्रतिशत बढी हो । पुष महिनामा म्युचुअल फण्डहरुले २ अर्ब ७८ करोड ४९ लाख रुपैयाँ नाफा कमाएका थिए । माघ महिनामा दुई फण्ड मात्रै घाटामा देखिएका छन् । पुष महिनामा भने ६ वटा म्युचुअल फण्डले घाटा ब्यहोरेका थिए ।  

नाफामा सुधार देखिएसँगै सबै फण्डको प्रतिइकाई खुद सम्पत्ति मूल्य (न्याभ) पनि बृद्धि भएको छ । गत पुष महिनाको अन्तिम कारोबार दिन नेप्से परिसूचक २५९३ विन्दुबाट बढेर माघ महिनाको अन्तिम कारोबार दिनसम्म २६८५ विन्दुमा उक्लिएको छ । यस हिसाबमा सेयरबजार ३.५५ प्रतिशतले बढेको देखिन्छ ।  

बजार बढेसँगै म्युचुअल फण्डहरुले खुद मुनाफामा उल्लेख्य सुधार गर्न सफल भएका छन् भने फण्डहरुको न्याभ र लगानीको भ्यालु समेत बढ्न पुगेको छ ।  

सेयरबजारमा म्युचुअल फण्डहरुको अर्बौ रकम लगानी रहेको हुन्छ । बजार घटबढ हुने बित्तिकै फण्डहरुको नाफा, न्याभ र लगानीको दायरा नै परिवर्तन हुने खालको वित्तीय सूचक फेरबदल हुने अवस्था आउँछ ।  

चालु आवको माघ महिनासम्ममा सबैभन्दा बढी नाफा कमाउने फण्डमा प्रभु सेलेक्ट फण्ड रहेको छ । फण्डले २२ करोड ५१ लाख रुपैयाँ नाफा कमाएको छ । यो नाफा अघिल्लो महिनाको तुलनामा ३३.६५ प्रतिशत बढी हो ।  

सो अवधिसम्म एनआइबिएल समृद्धि फण्ड–२ र मेगा म्युचुअल फण्ड–१ भने घाटामा रहेका छन् । एनआइबिएल समृद्धि फण्ड–२ ले १७ करोड रुपैयाँ र मेगा म्युचअल फण्ड–१ ले भने १ करोड ३२ लाख रुपैयाँ घाटा ब्यहोरेका छन् ।  

नाफामा उल्लेख्य सुधार देखिएसँगै सो अवधिसम्म सबै म्युचुअल फण्डको न्याभ बढेको छ । सबैभन्दा बढी न्याभ प्रभु स्मार्ट फण्डकै रहेको छ । फण्डको न्याभ १२.४३ रुपैयाँ छ ।  

म्युचुअल फण्डहरुले सो अवधिसम्म सेयरबजारमा ४० अर्ब ९६ करोड ६८ लाख रुपैयाँ बराबरको लगानी गरेका छन् । यो रकम अघिल्लो महिनाको तुलनामा ३.५८ प्रतिशत बढी हो । पुष महिनामा फण्डहरुले ३९ अर्ब ५४ करोड रुपैयाँ लगानी गरेका थिए ।  

सो अवधिसम्म १० वटा म्युचुअल फण्डबाहेक सबै फण्डको लगानीको भ्यालु बढेको छ । सबैभन्दा बढी गरिमा समृद्धि योजनाको लगानीको भ्यालु ८३३.८४ प्रतिशत बढी हो ।