नाफा र न्याभमा प्रभु क्यापिटलका दुवै फण्डको उत्कृष्ट प्रदर्शन, लगानीका लागि जोखिममुक्त

काठमाण्डौ । प्रभु क्यापिटल लिमिटेडका दुई म्युचुअल फण्डले वित्तीय सूचकमा उत्कृष्ट प्रदर्शन गरेका छन् । हाल क्यापिटलका प्रभु स्मार्ट फण्ड र प्रभु सेलेक्ट फण्ड सञ्चालनमा छन्, जुन दुबै बन्दुमुखी योजना हुन् ।  

यी दुईवटै फण्ड नेपाल स्टक एक्सचेञ्ज (नेप्से)मा सूचीकृत पनि छन् । दुबैको इकाई मूल्य १० रुपैयाँ भन्दा माथि छ । पछिल्लो समय बन्दमुखी योजनाका इकाईहरुको मूल्य दोस्रो बजारमा दश रुपैयाँ भन्दा तल भर्दा प्रभु क्यापिटलका योजनाका इकाईको मूल्य भने सो भन्दा माथि नै छ ।  

यता फण्डहरुले मासिक दरमा सार्वजनिक गर्ने वित्तीय रिर्पोटमा समेत उत्कृष्ट प्रदर्शन गरेका छन् । फण्डहरुले विशेषगरी सेयरबजार, बैंक मुद्दती निक्षेप, डिबेञ्चर÷बण्ड र सार्वजनिक निष्कासन धितोपत्रमा लगानी गरेका हुन्छन् ।  

प्रभु क्यापिटलका दुईवटै फण्डले चालु आवको माघ मसान्तसम्म यस्तो क्षेत्रमा २ अर्ब ३६ करोड ७४ लाख रुपैयाँ लगानी गरेका छन् । जसमा प्रभु स्मार्ट फण्डले १ अर्ब ८ करोड ९२ लाख रुपैयाँ र प्रभु सेलेक्ट फण्डले १ अर्ब २७ करोड ८२ लाख रुपैयाँ यस्तो क्षेत्रमा लगानी गरेको छ ।  

लगानीको दायरा फराकिलो बनाएसँगै माघ महिनाको अन्तिमसम्म सर्वाधिक नाफा कमाउनेमा प्रभु सेलेक्ट फण्ड रहेको छ । फण्डले सो अवधिसम्म २२ करोड ५१ लाख रुपैयाँ नाफा कमाएको छ । जुन यो अघिल्लो महिनाको तुलनामा ३३.६५ प्रतिशत बढी हो ।  

त्यस्तै, प्रभु स्मार्ट फण्डले पनि सो अवधिसम्म १७ करोड ५४ लाख ४१ हजार रुपैयाँ नाफा आर्जन गरेको छ । यो नाफा पनि अघिल्लो महिनाको तुलनामा ३०.८५ प्रतिशत बढी हो ।  

क्यापिटलका दुईवटै म्युचुअल फण्डको प्रतिइकाई खुद सम्पत्ति मूल्य (न्याभ) १२ रुपैयाँमाथि छ । म्युचुअल फण्डहरुमध्ये सबैभन्दा बढी न्याभ प्रभु स्मार्ट फण्डको रहेको छ । फण्डको न्याभ १२.४३ रुपैयाँ छ भने प्रभु सेलेक्ट फण्डको न्याभ १२.३० रुपैयाँ छ ।  

माघ महिनासम्ममा प्रभु सेलेक्ट फण्डको सेयरबजारमा लगानीको भ्यालु १ अर्ब २० करोड रुपैयाँ र प्रभु स्मार्ट फण्डको १ अर्ब ५ करोड रुपैयाँ रहेको देखिन्छ । धितोपत्र दोस्रो बजारमा प्रभु स्मार्ट फण्डको इकाई मूल्य १०.४९ रुपैयाँ छ भने प्रभु सेलेक्ट फण्डको न्याभ १०.३९ रुपैयाँ रहेको छ ।  

लगानीका लागि कति उचित ?

म्युचुअल फण्डको इकाईमा लगानी गर्दा धेरै कुरामा ध्यान दिनुपर्दछ । विशेषगरी फण्डको पछिल्लो प्रस्तुती र पोर्टफोलियो हेर्न जरुरी हुन्छ । आफुले लगानी गर्न लागेको फण्डको न्याभको अवस्था र फण्डले रिटर्न दिन सक्छ वा सक्दैन त्यो हेर्न जरुरी हुन्छ ।  

म्युचुअल फण्डमा लगानी गर्नुअघि संस्थाको पोर्टफोलियो हेर्न अनिवार्य हुन्छ । फण्डमा लगानी गरेपछि लगानीकर्ताले २० देखि ३० प्रतिशतसम्मको आशा गरेका हुन्छन्, तर यो आशा अवास्तविक हो । म्युचुअल फण्ड बजारको प्रदर्शनमा निर्भर हुन्छ ।  

सबाहेक फण्डको खर्चको विवरण पनि हेर्न आवश्यक हुन्छ । खर्च बढ्दै गएमा सम्बन्धित संस्थाले लगानीकर्तालाई रिटर्न नदिने अवस्था आउन सक्छ । तर पछिल्लो रिर्पोट हेर्दा प्रभु क्यापिटलका फण्डहरुको खर्च सामान्य र पोर्टफोलियो उत्कृष्ट देखिएको छ ।  

यसआधारमा नै फण्डहरुको वित्तीय अवस्थामा ग्रोथ हुँदै जाने हो भने क्यापिटलले फण्डका इकाईधनीहरुलाई उत्कृष्ट प्रतिफल दिन सक्नेछ । लगानीकर्ताले विशेषगरी फण्डको मुनाफाको अवस्था र फण्डको न्याभको अवस्था हेर्नुपर्दछ । यी सूचकहरुमा प्रभु क्यापिटलका दुईवटै फण्डको उत्कृष्ट प्रदर्शन देखिएको छ ।