लगातार ६ दिन घट्यो नेप्से, एउटाबाहेक सबै समूहमा रातो पोतियो

काठमाण्डौ । साताको दोस्रो कारोबार दिन आज पनि नेपाल स्टक एक्सचेञ्च (नेप्से) मा दोहोरो अंकको गिरावट आएको छ । आज नेप्से परिसूचक ०.७४ प्रतिशत अर्थात २०.६८ अंकले घटेर २ हजार ७५१.४२ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.७६ प्रतिशतले घटेर ४५९.७६ विन्दुमा झरेको छ । यो दिन नेप्सेमा सूचीकृत मध्ये ३११ वटा स्क्रिप्टको १ करोड ५० लाख ९४ हजार ९१५ कित्ता सेयर ८ अर्ब ३७ करोड ८० लाख रुपैयाँभन्दा बढीको कारोबार भएको  छ ।

योसँगै बजार लागातार ६ दिन घटेको छ ।  

आजको बजारको विषयमा नेपाल इन्भेष्टर फोरमका अध्यक्ष तुलसीराम ढकालले बजारले लय समाति सकेका कारण लगानीकर्ता डराउनु पर्ने कुनै कारण नरहेको बताए । ‘सेयर बजारमा घटबढ हुनु सामान्य नै हो । धितोपत्र बोर्डले इन्भेष्टमेन्ट कम्पनीहरुलाई गरेको व्यवस्था पुरानै हो । तर लगानीकर्ताहरु बिनाकारण डराएर सेयर बेचिरहेका छन्,’ उनले भने ।  

अघिल्लो साता बढेको बजारमा करेक्सन आउनु स्वभाविक भएको पनि ढकालको तर्क रहेको छ ।  

त्यसैगरि, बजार जानकार अजय सिंह थापाले बजार लगानीकर्ताले अपेक्षा गरे भन्दा बढी घटेको बताए । ‘अघिल्लो साताहरुमा गभर्नरको बहिर्गमनको विषयले बजार बढेको थियो । तर यो साता इन्भेष्टमेन्ट कम्पनीहरुलाई धितोपत्र बोर्डले दर्ता हुन निर्देशन दिनु र राजाबादीहरुको प्रर्दशनको विषयले बजारमा थप गिरावट आएको छ, ’ उनले भने । यद्यपी बजारमा २७५० को विन्दुमा बलिया सपोर्ट रहेको उनको तर्क रहेको छ । यदि यो विन्दुभन्दा तल बजार बन्द भएमा भने केही समय बजारमा करेक्सनमा चल्न सक्ने पनि उनको विचार रहेको छ ।

यो दिन नेप्सेमा सूचीकृत १३ वटा समूहमध्ये अन्य समूहबाहेक सबैमा रातो पोतियो । आज अन्य समूह ०.०८ प्रतिशतले बढ्यो ।  

म्युचुअल फण्ड समूह आज सर्वाधिक घट्यो । यो समूह आज ३.०६ प्रतिशतले घट्यो । बैंकिङ समूह पनि आज ०.४४ प्रतिशत,विकास बैंक ०.७३, फाइनान्स ०.७०,होटल ०.९९,हाईड्रो १.१६, लगानी १.५१, जीवन बीमा ०.४१,उत्पादन तथा प्रशोधन १.१५,लघुवित्त ०.६३,लघुवित्त ०.६३ र निर्जीवन बीमा समूह ०.६८ प्रतिशतले घट्यो ।  

धेरै कारोबार गर्ने कम्पनीहरु

यो दिन नेपाल पुनर्बीमाको सर्वाधिक सेयर कारोबार भयो । आज यो कम्पनीको ७३ करोड ५० लाख बढीको कारोबार भयो । हिमालयन रि इन्स्योरेन्सको पनि आज ७३ करोड १७ लाख, एनएलजी इन्स्योरेन्सको ३४ करोड ९८ लाख,घलेम्दी हाईड्रोको ३३ करोड ४७ लाख र गार्डियन माईक्रो लाइफको ३० करोड ४२ लाख बढीको कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएको एउटा मात्रै कम्पनीको सेयरमूल्यमा अपर सर्किट लाग्यो । नेष्डो समृद्ध लघुवित्तको सेयरमूल्य आज ९.९८ प्रतिशतले बढ्यो ।  

यस्तै गार्डियन माइक्रो लाइफको सेयरमूल्य ८.७३ प्रतिशत,विन नेपाल लघुवित्तको ८.५३र स्वाभिमान लघुवित्तको सेयरमूल्य ३.०२ प्रतिशतले बढ्यो ।  

उपकार लघुवित्तको सेयरमूल्य आज सर्वाधिक घट्यो । यो कम्पनीको सेयरमूल्य ६.९८ प्रतिशतले ओरालो लाग्यो ।