दोस्रो बजारमा सहायक कम्पनीमार्फत सेयर खरिदबिक्री गर्दै हाथवे, धितोपत्र बोर्ड भन्छ, ‘अनुसन्धान गर्छौ’

काठमाण्डौ । दोस्रो बजारमा सूचिकृत हाथवे इन्भेष्टमेन्ट कम्पनीले आफ्नो सहायक कम्पनी ‘हाथवे स्टक डिलर’ मार्फत दोस्रो बजारमा पनि सेयर खरिद गरेको भेटिएको छ । कम्पनीले प्रकाशित गरेको आफ्नो वार्षिक प्रतिवेदनमा कम्पनीले हाथवे स्टक डिलर मार्फत सेयर खरिद गरेको देखिन्छ ।  

कम्पनीले आफ्नो ९० प्रतिशत लगानी सहायक कम्पनी हाथवे स्टक डिलरमा गरेको जनाएको छ । कम्पनीले दोस्रो बजारमा लगानी गरेको विषय वार्षिक प्रतिबेदनमा प्रष्ट रुपमा उल्लेख गरेको छ ।

विशेषगरी, दोस्रो बजारमा सूचिकृत कम्पनीहरुले सेयरमा लगानी गर्न नमिल्ने प्रावधान रहेको छ । तर यहि प्रावधानलाई छल्न इन्भेष्टमेन्ट कम्पनीहरुले सहायक कम्पनी खोलेर सेयर कारोबार गरेको पाइन्छ । तर धितोपत्र बोर्डको कुनै पनि ऐन तथा विनियामवलीमा दोस्रो बजारमा सहायक कम्पनी मार्फत  सूचिकृत भएका इन्भेष्टमेन्ट कम्पनीहरुले सेयर कारोबार गर्न मिल्ने व्यवस्था नरहेको धितोपत्रबोर्ड स्थित उच्च स्रोतले दावी गर्यो ।  

स्रोतका अनुसार यदि यस्तो भएको पाइए त्यो धितोपत्र बोर्डको नियमन विभागको कमजोरी भएको स्रोतले जनाएको छ । अघिल्लो साता एनआरएन इन्फ्रास्टक्चर एण्ड डेभलपमेन्ट कम्पनीले अक्सनबजार मार्फत सेयर खरिद गरेपछि यस विषयमा बोर्डले दोस्रो बजार वा अक्सन बजारमार्फत सेयर खरिद गर्न नपाउने भन्दै सूचना जारी गरेको थियो । यसै विषयमा बोल्दै हाथवे इन्भेष्टमेन्ट नेपालका स्वतन्त्र सञ्चालक केशब कोइरलाले बैंकका सहायक कम्पनी म्युचुअल फण्डले जस्तै सूचिकृत इन्भेष्टमेन्ट कम्पनीहरुका सहायक कम्पनीले पनि सेयर किन्न पाउने दावी गरे ।  

कोइरलाले हाथवे इन्भेष्टमेन्ट कम्पनीको ९० प्रतिशत लगानी हाथवे स्टक डिलरमा रहेको पनि स्वीकारे । तर धितोपत्र बोर्डका कार्यकारी निर्देशक बिनय देब आचार्यले सूचिकृत इन्भेष्टमेन्ट कम्पनीहरुलाई दोस्रो बजारमा सेयर खरिद गर्न नपाउने सर्तमा नै आईपीओमा जान दिइएको बताए । उनले भने, ‘यदि त्यस्ता कम्पनीहरुले सहायक कम्पनीमार्फत सेयर खरिदबिक्री गरेका छन् भने अनुसन्धान हुन्छ ।’ यसै

गरि अन्य दोस्रो बजारमा सूचिकृत इमर्जिङ नेपाल  , एनआरएन इन्फ्रास्टक्चर डेभलपमेन्ट बैंक र सीईडिबि होल्डिङ कम्पनीले पनि सहायक कम्पनीमार्फत दोस्रो बजारमा सेयर खरिदबिक्री गर्दै गरेको स्रोतको दाबी रहेको छ ।