५० दिने मुभिङ एभरेजमा सपोर्ट लिएको बजारको अबको सम्भावना कस्तो ?

काठमाण्डौ । आज बजार २१ अंकले घटेर बन्द भयो । दिनभर उतारचढाव रहेको आजको बजार अन्तिम समयमा भने केही सम्हालिएको थियो । तर कारोबारमा भने पछिल्लो समय दैनिक गिरावट आईरहेको छ ।  

आजको बजारलाई मुभिङ एभरेजबाट नियाल्दा ५० दिने मुभिङ एभरेजमा सपोर्ट लिएर फर्किएको देखिन्छ । मूभिङ एभरेजले घट्दो बजारमा सपोर्ट लिएको हुन्छ भने बढ्दो बजारमा प्रतिरोध सामना गर्ने गर्छ  ।

डेली बेसमा आजको बजारलाई इन्डिकेटरबाट नियाल्दा भने खासै सुधार आएको छैन । म्याक्डीमा वियरिस क्रसओभर भ्यालिड नै छ । हिस्टोग्राम नेगेटिभ र लामा–लामा हुँदै गएका छन् । त्यसैगरि, आरएसआईमा पनि बजार न्यूट्रल जोन भन्दा तल चलेको छ ।  

मनी फ्लो इन्डेक्समा पनि बजार घट्दो क्रममा नै देखिन्छ । पिभट् प्वइन्टबाट नियाल्दा आज बजारले पहिलो सपोर्ट २६९२ विन्दुमा लिएको छ भने अबका नजिकको सपोर्ट २६५० , २६०० विन्दुमा लिन सक्ने देखिन्छ । बढेमा भने २७५६, २८०० र २८६० को विन्दुमा प्रतिरोध लिन सक्छ । आज ५० दिने  मुभिङ एभरेजमा सपोर्ट लिएको बजार यदि आगामी दिनमा २७०० विन्दुभन्दा माथि टिकेको खण्डमा भने बजारले माथिको यात्रा तय गर्न सक्ने छ । अन्यथा बजारमा केही समय करेक्सन पनि चल्न सक्ने छ ।