प्रतिकित्ता ५४१ मा कारोबार भईरहेको शिवम् सिमेन्टको सेयर एकाएक ५०० मा कसरी भयो कारोबार ? यस्तो छ कारण

काठमाण्डौ । मंगलबारको सेयर कारोबारमा शिवम् सिमेन्टको सेयर प्रतिकित्ता ५४९ मा खुलेको थियो भने अन्तयमा ५३९ रुपैयाँमा बन्द भयो । दिनभरको न्यून विन्दु ५३८ रुपैयाँ रह्यो भने उच्च मूल्य ५४९ रुपैयाँ रह्यो । तर दिनभरको कारोबारमा यो कम्पनीको ४ हजार ६३ कित्ता सेयर एकाएक प्रतिकित्ता ५०० रुपैयाँमा विन्डोमा देखिएपछि लगानीकर्ता अचम्ममा परे ।  

हालको कारोबारको नियमानुसार कुनै पनि कम्पनीको सेयर एकपटकको कारोबारमा २ प्रतिशत र दिनभरको कारोबारमा १० प्रतिशत भन्दा तलमाथि हुन पाउदैन । तर एकाएक यो कम्पनीको ४ हजार कित्ता बढी सेयर ५ सयमा कारोबार भएपछि आमसर्वसाधरणहरुले यो कम्पनीमा चलखेल भएको हुन सक्ने पनि अड्कलबाजी गर्न भ्याए ।  

तर हामीले अनुसन्धान गर्दा वास्तविकता भने अर्के रहेको पायौं । नेप्सका प्रवक्ता मूराहरी पराजुलीले यो कम्पनीमा चलखेल नभएको बताए । पराजु्‌लीका अनुसार मुद्दा मामिलामा परेर जफत भएको सेयर वा अक्सन बजारमा नबिकेको सेयर टीएमएसको ‘नेगोसियटेड वीन्डो’ मार्फत कारोबार हुने बताए । शिवम् सिमेन्टको हकमा पनि यही भएको पराजुलीले जानकारी दिए । उनका अनुसार यस्तो कारोबारले नियमित कारोबारलाई भने केही प्रभाव पार्दैन ।