दुईदिनमा ८० अंकले बढ्यो नेप्से, ‘गभर्नरका लागि चर्चामा रहेका व्यक्तिहरुप्रति आशावादी लगानीकर्ता’

काठमाण्डौ । साताको अन्तिम कारोबार दिन आज पनि नेपाल स्टक एक्सचेञ्च (नेप्से) दोहोरो अंकले बढेको छ । आज नेप्से परिसूचक १.५८ प्रतिशत अर्थात ४१.४३ अंकले बढेर २ हजार ६६३.३० विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि १.३५ प्रतिशतले बढेर ४४६.६५ विन्दुमा पुगेको छ । यो दिन नेप्सेमा सूचीकृत मध्ये ३०९ वटा स्क्रिप्टको ९७ लाख ७२ हजार १९६ कित्ता सेयर ५ अर्ब २२ करोड ३० लाख रुपैयाँभन्दा बढीको कारोबार भएको  छ ।

यससँगै नेप्सेमा लगातार दुईदिन वृद्धि देखिएको छ । यो दुई दिनमा नेप्से परिसूचकमा ८० अंकको सुधार आएको छ ।  

आजको बजारबारे बजार जानकार उपेन्द्र पाठक भन्छन्,  केही दिनदेखि राजनीतिक कारणले घटेको बजार दुई दिनयता सम्हालिदै गएको देखिन्छ । अहिले नयाँ गभर्नरका लागि चर्चामा रहेका व्यक्तिहरुप्रति लगानीकर्ता आशावादी बन्दा बजारमा सुधार आएको छ ।’

घटेको समयमा पैसा हुनेले अवसर छोपेकाले सूचकसँगै कारोबार पनि बिस्तारै बढ्दै गएकाले उनले बताए ।  

अर्का बजार जानकार यज्ञ घिमिरेले बजारमा चैत मसान्तको दबाब कम हुँदै गएको, राजनीतिक विषयको प्रभाव कम हुँदै गएको र नयाँ आउने गभर्नरप्रतिको आशाका कारण बजार बढेको बताए । ‘प्राविधिक रुपमा पनि बजारले २५८० बाट सपोर्ट लिएर फर्केका कारण पनि लगानीकर्ताको मनोबलमा सुधार आएको छ।’ उनले भने ।      

यो दिन नेप्सेमा सूचीकृत १३ वटै समूहमा हरियाली छायो । आज व्यापार समूह सर्वाधिक अर्थात ५.०५ प्रतिशतले बढ्यो । यस्तै बैंकिङ समूह ०.९९ प्रतिशत,विकास बैंक १.१८, फाइनान्स १.४५, होटल ०.६५, हाईड्रोपावर १.२१, लगानी २.१६,जीवन बीमा १.७९,उत्पादन तथा प्रशोधन १.०१,लघुवित्त २.२८,म्युचुअल फण्ड ०.४१,निर्जीवन बीमा ०.९५ र अन्य समूह १.६८ प्रतिशतले बढ्यो ।  

धेरै कारोबार गर्ने कम्पनीहरु

यो दिन हिमालयन रि इन्स्योरेन्सको सर्वाधिक सेयर कारोबार भयो । आज यो कम्पनीको ५१ करोड १८ लाख बढीको कारोबार भयो । नेपाल पुनर्बीमाको पनि आज २७ करोड ७ लाख, एनआरएन इन्फ्रास्ट्रक्चरको २५ करोड ३३ लाख,सिईडिबि होल्डिङको २० करोड ४९ लाख र ग्रीन डेभलपमेन्ट बैंकको १८ करोड ९४ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका २ वटा कम्पनीको सेयरमूल्यमा अपर सर्किट लाग्यो । आज गुराँस लघुवित्त र श्रृजनशिल लघुवित्तको सेयरमूल्य १० प्रतिशतले बढ्यो ।  

यस्तै सपोर्ट माईक्रोफाइनान्सको ८.६०, मानुषी लघुवित्तको ७.७८ र अभियान लघुवित्तको सेयरमूल्य ७.६१ प्रतिशतले बढ्यो ।  

कुमारी सबल योजनाको मूल्य आज सर्वाधिक घट्यो । यो योजनाको मूल्य आज १.८२ प्रतिशतले ओरालो लाग्यो ।