सुनको मूल्य अल टाइम हाई नजिक, एकैदिन ३५ डलरको बढोत्तरी

काठमाण्डौ । अमेरिकाले विभिन्न देशहरुमाथि ट्यारिफको सूची सार्वजनिक गरेसँगै सुनको मूल्य उच्च वृद्धि भएको छ । आजको कारोबारमा सुनको मूल्य १.१५ प्रतिशत अर्थात ३५.६५ डलरले बढेको छ । यो वृद्धिसँगै सुनको मूल्य हालसम्मकै उच्च नजिक अर्थात प्रतिऔंस ३ हजार १४७ डलरमा कारोबार भईरहेको छ ।  

विश्लेषकहरुले अमेरिकी ट्यारिफ अपेक्षा गरेभन्दा बढी कठोर भएको बताउदै सुनको भाउले ३२ सय डलरको आँकडा छिट्टै पार गर्ने अपेक्षा गरेका छन् ।  

राजनीतिक र आर्थिक संकटका बेला सुरक्षित मानिने सुन यो वर्ष प्रतिऔंस ५ सय डलरभन्दा बढीले बढिसकेको छ । मंगलबार सुनको मूल्य हालसम्मकै उच्च अर्थात ३ हजार १४८ डलर पुगेको थियो ।  

यस्तै आज डलर केही कमजोर बन्दा समेत सुनको भाउ बढेको हो । आज डलर इन्डेक्स ०.४ प्रतिशतले खस्किएको छ । जसका कारण डलरबाहेकका मुद्राधारकहरुलाई सुनको खरिद सस्तो पर्न गएको छ ।  

आज चाँदीको मूल्य भने ०.२१ डलरले घट्दै प्रतिऔंस ३३.३७ डलर कायम भएको छ ।