आजबाट थप २ ब्रोकरले सुरु गरे नयाँ टीएमएस सेवा

काठमानण्डौ । आजदेखि थप २ वटा ब्रोकरहरुबाट नयाँ टीएमएस सुरु भएको छ । डीजी हबले दिएको जानकारी अनुसार आज नेपाल स्टक हाउस(स्टक ब्रोकर नम्बर १४) र डाइनामिक मनी म्यानेजर (स्टक ब्रोकर नम्बर ४४)बाट नयाँ टीएमएस मार्फत सेयर कारोबार सुरु भएको हो ।  

यसै सातादेखि कालिका सेक्यूरिटिज (स्टक ब्रोकर नम्बर ४६) बाट पनि नयाँ टीएमएसबाट सेयर कारोबार भएको थियो । यो सँगै नयाँ टीएमएस लिने ब्रोकरको संख्या पाँच पुगको छ । अब यी ब्रोकरका नयाँ तथा पुराना सबै ग्राहकहरुले अब नयाँ टीएमएस चलाउन पाउने भएका छन् । डीजीहबले नयाँ पुराना गरेर ५० प्रतिशत भन्दा बढी ब्रोकरले नयाँ टीएमएसमा जाँदै गरेको पनि जानकारी दियो ।  

नयाँ भर्जनको टीएमएस डेक्सटपमा विभिन्न नयाँ फिचर्स रहेका छन् । जसमा मल्टिपल विन्डो खोल्न मिल्ने, बेचेको एक मिनेटमा नै कोल्याट्रल लोड हुने, आफ्नो सेयर र पोर्टफोलियो तुरुन्तै हेर्न मिल्ने तथा प्राविधिक चार्ट पनि हेर्न मिल्ने रहेका छन् । यसमा आफ्नो लिमिट, बेच्न मिल्ने सेयर संख्या जस्ता सहज फिचर पनि समावेश छन् ।  

यस्तै, कम्पनी फलोअप गर्न निकै सहज रहेको छ । यसमा आफूले किन्न तथा बेच्न चाहेको कम्पनीको भोल्युम तथा कारोबार, आधारभूत तथा प्राविधिक पक्ष सबै हेर्न अन्त जानु पर्दैन ।  

डेक्सटपमा विभिन्न फिचर्सका साथै मोबाइल एपमा पनि कारोबार गर्न निकै सहज रहेको छ । सेक्योर्ड सेक्यूरिटिजका सञ्चालक सन्तोष मैनालीले दिएको जानकारी अनुसार मोबाइल एपमा ग्राहकहरुले निकै राम्रो प्रतिक्रिया दिएका छन् । उनले भने, ‘डेक्सटप भर्जन प्राविधिक चार्ट नियालेर कारोबार गर्नेलाई सहज रहेको छ । मोबाइल एप भने युवादेखि बुढाबुढी सबैका लागि सहज छ । कुनै पनि व्यक्तिले आफ्नै मोबाइलमा एप डाउनलोड गरेर ११ बजेदेखि ३ बजेको कारोबारको समयमा सहज रुपमा कारोबार गर्न सक्छ । मोबाइल एपमा प्राविधिक चार्ट बाहेक सबै फिचर रहेको छ ।’  

यसले अब सरकारी कर्मचारी र अन्य बैंकका कर्मचारीहरुलाई पनि सहज हुने ब्रोकरमा भेटिएका एक लगानीकर्ताले बताए । ‘किनकी ती ठाँउहरुमा सरकारले डेक्सटप भर्जनमा टीएमएस नचल्ने बनाएको थियो । अब मोबाइल डेटा लिएर आफ्नै मोबाइल एपबाट कुनै पनि ठाँउबाट सेयर कारोबार गर्न कसैले रोक्न सक्ने अबस्था छैन,’ उनले भने ।  

यसै ब्रोकरमा भेटिएका एक लगानीकर्ताले भने, ‘केही समय पहिले नेपाल सरकारले सिंहदरबार र अदालत परिसरमा सेयर कारोबारलाई रोक लगाएको थियो । अब भने ती ठाँउबाट सेयर कारोबार रोकिने छैन ।’