सुनको मूल्यले बनायो नयाँ अलटाईम हाईको रेकर्ड, कहिलेसम्म बढिरहन्छ ?

काठमाण्डौ । अन्तर्राष्ट्रिय बजारमा सुनको मूल्यले यसअघि कायम अलटाईम हाईको रेकर्ड ब्रेक गरेको छ ।  

पछिल्लो समय सुनको मूल्य प्रति औंस ७७.२८ डलरले बढ्दै ३२३८.८२ डलरको नयाँ उचाईमा पुगेको हो । 

यसअघि शुक्रबार सुनको भाउले प्रतिऔंस ३ हजार २१८.२४ डलरको अलटाईम हाई कायम गरेको थियो ।  

सुनको शनिवार कायम भएको प्रति औंस ३२३८.८२ डलरको मूल्य हालसम्मकै उच्च हो ।  

यसअघि गत अप्रिल ३ मा सुनको मूल्य प्रतिऔंस ३ हजार १६७.५७ डलर पुगेको थियो । त्यसपछि पनि निरन्तर बढिरहेको छ ।    

डलरको भाउमा आएको गिरावट र चीन र अमेरिकाबीचको बढ्दो व्यापार संकटका कारण सुनको मूल्यमा उछाल आएको हो । विश्व आर्थिक अनिश्चितता र भू–राजनीतिक तनाव जस्ता परिस्थिति सुनको मूल्य उकालो लाग्नका लागि कारकहरु हुन् । 

अमेरिकी राष्ट्रपति डोनाल्ड ट्रम्पले चीनमाथि एकपछि अर्को ट्यारिफ थपिरहेका छन् । जसका कारण यी दुई देशबीचको व्यापारयुद्ध थप चर्किदै गएको छ ।  

सुन विश्लेषकहरुले सुनको उकालो यात्रा जारी रहनेमा भने आशंका प्रकट गरेका छन् । अमेरिकी केन्द्रीय बैंक फेडरल रिजर्भले ब्याजदर कटौती गर्न सक्ने सम्भावनका बीच डलर बलियो हुने भएकाले सुनको मूल्य उकालो यात्रामा चाँडै ब्रेक लाग्न सक्छ ।