ग्राउण्ड जिरोका लगानीकर्ता भन्छन् ‘३२ सयको विन्दुदेखि फसेको फस्यै भईयो, गभर्नर नआएसम्म बजार यस्तै ’

काठमाण्डौ । सधैंको साता जस्तै आज पनि हामीले नियमित स्तम्भ ग्राउण्ड जिरोलाई निरन्तरता दिएका छौं । यसै सिलसिलामा आज हामी राजधानीका ज्ञानेश्वर र कमलादी आसपासका केही ब्रोकर हाउसहरुमा पुगेका थियौं ।  

आज हामी सबै भन्दा पहिले ज्ञानेश्वरस्थित सूमेरु सेक्यूरिटिज (स्टक ब्रोकर नम्बर ३९) मा पुग्यौं । हामी यहाँ पुग्दा लगानीकर्ताहरु आउने क्रम जारी थियो भने केही भने पहिले नै ब्रोकर हाउसमा उपस्थित भईसकेका थिए । बजार आफ्नै गतिमा अघि बढिरहेको थियो । लगानीकर्ता आ–आफ्नै सुरमा थिए । यतिकैमा केही महिला  लगानीकर्ताहरु ‘नमस्तै है ! साथीहरु’ भन्दै ब्रोकर हाउसमा छिरे । ती महिला लगानीकर्ताहरुलाई जवाफ फर्काउँदै पहिले नै पुगेका एक पुरुष लगानीकर्ताले भने, ‘आज त ११ नबज्दै आउनु भयो । बजारमा केही हुन्छ कि जस्तो छ ।’ ती महिला लगानीकर्ताहरुले भने, ‘के हुँनु संधै फसेको फस्यै छ । सधैं ब्रोकर आउने जाने काम मात्रै भएको छ ।’

यसै ब्रोकरमा एक नयाँ युवा लगानीकर्ता पनि भेटिए । भर्खर प्लस टुको परिक्षा सकेर फुर्सदमा सेयर बजार अएका ति लगानीकर्ताले आफूलाई क्रेष्ट माइक्रोको १० कित्ता आईपीओ परेको अनुभव साटे । उनले भने, ‘अब यो कम्पनीको सेयर बेचेर मोबाइल किन्नु पर्ला । बिस्तारै दोस्रो बजारमा पनि सेयर किन्ने बिचार गरेको के किन्ने हो ?’ उनीसँगै बसेका लगानीकर्ता जवाफ दिए, ‘बिचार गरेर पस्नु है ! यो बजारमा । हामी त कोभिडदेखि सेयर बजार पसेको फसेको फस्यै भयौं ।’

उनी सँगै बसेका एक लगानीर्ताल भने, ‘कहिले बढ्ने होला फेरि त्यसरी यो बजार ? हामीलाई फसाउन मात्रै बढेको रहेछ,’ उनले टाउकोमा हात राख्दै भने, ‘अब बढोस् न मात्रै हामीले पनि जानेका छौं । कहाँ गए होलान् ती हामीलाई ३२ सयमा फसाउनेहरु ?’ उनी सँगै बसेकी एक महिला लगानीकर्ताले भनिन् ‘कही गएका छैनन् । ती पनि यही बजारमा फसेर नै बसेका छन् । ब्रोकर हाउसमा यस्तै गफगाफ चल्दै थिए । मध्यान्नको १२ बज्दै थियो । बजार सामान्य अंकले तलमाथि गर्दै थियो ।

यहाँबाट हामी नजिकै रहेको क्यापिटल म्याक्स सेक्यूरिटिज (स्टक ब्रोकर नम्बर ६२) मा पुग्यौं । यहाँ पनि केही लगानीकर्ताहरु बजार हेर्न मस्त देखिन्थे । यतिकैमा एक लगानीकर्ताले अब लघुबित्त कम्पनी बढ्ने भनेको सुनियो । अर्का एक लगानीकर्ताले भने नेपाल रि–इन्स्योरेन्सको सेयरमा फेरि चमक आएको तर्क गर्दै थिए ।  

यहाँबाट हामी चारखालमा नै रहेको श्रीकृष्ण सेक्यूरिटिज (स्टक ब्रोकर नम्बर २८) मा पुग्यौं । यहाँ पनि लगानीकर्ताहरु बजार हेर्नमा मस्त देखिन्थे । केहीले भने सरकारले गभर्नर समयमा नियुक्ति गर्न नसेको भन्दै असन्तुष्टि पोखे । यसै ब्रोकरमा केही लगानीकर्ताहरुले हिमालयन रि इन्स्योरेन्स र नेपाल  ,पुनर्बीमाको चर्चा पनि गरे । यसबेलासम्म दिनको १ बजिसकेको थियो ।  

आज मध्यान्हमा राजधानीमा केही हल्का वर्षा पनि हुँदै थियो । यतिकैमा हामी कमलादीमा रहेको क्रियटिभ सेक्यूरिटिज (स्टक ब्रोकर नम्बर ४०) म पुग्यौ । बजार सामान्य अंकले तल–माथि गर्दै थियो । केही लगानीकर्ताहरु मस्त निन्द्रामा देखिन्थे भने केही बजार हेर्न ब्यस्त थिए । ‘अब बजार, बजेट नआउँदा र गभर्नर नियुक्ति नहुँदासम्म यस्तै हो । अहिले सेयर किन्न पनि सकिन्न भएको बेच्न पनि सकिन्न,’ एक लगानीकर्ताले बोलेको सुनियो ।