गभर्नर नियुक्तिको सम्भावनाका बीच नेप्सेमा उच्च वृद्धि, सबै समूहमा हरियाली

काठमाण्डौ । साताको तेस्रो कारोबार दिन आज नेपाल स्टक एक्सचेञ्च(नेप्से) उच्च अंकले बढेको छ । आज नेप्से परिसूचक १.८६ प्रतिशत अर्थात ४९.०९ अंकले बढेर २ हजार ६७७.४५ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि १.९६ प्रतिशतले बढेर ४५१.०१ विन्दुमा पुगेको छ । यो दिन नेप्सेमा सूचीकृत मध्ये ३१० वटा स्क्रिप्टको १ करोड ६८ लाख ८८ हजार ४५९ कित्ता सेयर ७ अर्ब ३१ करोड २७ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार दामोदर गजुरेल भन्छन्,  ‘आज अर्थमन्त्रीले गभर्नर सिफारिस समितिको बैठक डाकेका छन् । यस्तै मन्त्रिपरिषदको बैठक पनि आजनै डाकिएकाले गभर्नर नियुक्ति हुने आँकलनका साथ आज बजारमा सुधार आएको हो ।’

यद्यपी आज बजार बढेता पनि यसलाई स्विङ मात्रै भन्न सकिने उनले बताए । ‘दीर्घकालिन रुपमा बजार बढ्नका लागि भने गभर्नरले अपनाउने मौदिक्र नीति र बजेटले अहम् भूमिका खेल्नेछ । प्राविधिक रुपमा पनि बजार २६९० देखि २७ सय विन्दुसम्ममा प्रतिरोध रहेको देखिन्छ र यहाबाट माथि लागे बजारले केही समय अप ट्रेण्ड लिने छ,’ उनले भने ।  

त्यस्तै नेपाल सेयरधनी संघका उपाध्यक्ष कमलराज अधिकारीले पनि आज सत्तारुढ दलबीच गभर्नर नियुक्तिको विषयमा जुटेको सहमतिले बजारमा सकारात्मक प्रभाव पारेको बताए ।  

‘गभर्नरमा चर्चा भएका डा. विश्व पौडेल पूँजी बजारप्रति सकारात्मक नै देखिन्छन् । यसकारण अहिले मन्दीमा रहेको अर्थतन्त्र सकारात्मक दिशामा जाने सम्भावना देखिन्छ,’ उनले भने ।  

बजारमा गूड न्यूजको अभाव भएका बेला पौडेल गभर्नर बनेमा सर्वत्र सकारात्मक माहौल बन्ने पनि उनले दाबी गरे ।        

यो दिन नेप्सेमा सूचीकृत १३ वटै समूहमा हरियाली छायो । आज होटल समूह सर्वाधिक बढ्यो । यो समूह आज ३.६८ प्रतिशतले बढ्यो । बैंकिङ समूह पनि आज २.१५ प्रतिशत, विकास बैंक ३.०१, फाइनान्स २.६०, हाईड्रो २.६०,लगानी २.६३,जीवन बीमा १.४४, उत्पादन तथा प्रशोधन १.७८,लघुवित्त १.४३, म्युचुअल फण्ड ०.४०,निर्जीवन बीमा १.९३,अन्य ०.७७ र व्यापार समूह १.५० प्रतिशतले बढ्यो । 

धेरै कारोबार गर्ने कम्पनीहरु

यो दिन राधी विद्युत कम्पनीको सर्वाधिक सेयर कारोबार भयो । आज यो कम्पनीको ४१ करोड ८० लाख बढीको सेयर कारोबार भयो ।  

यस्तै ङादी ग्रुप पावरको ३६ करोड ८३ लाख, युनिभर्सल पावरको ३१ करोड ७४ लाख,सानिमा माई हाईड्रोको ३० करोड ४९ लाख र सोल्टी होटलको २९ करोड २८ लाख बढीको सेयर कारोबार भयो ।    

धरै कमाउने र गुमाउने कम्पनीहरु

आज नेप्सेमा कारोबार भएका ५ वटा कम्पनीको सेयरमूल्यमा अपर सर्किट लाग्यो । आज सिन्धु विकास बैंक, सप्तकोशी डेलभपमेन्ट बैंक, ओम मेगाश्री फर्मास्युटिकल्स,राप्ती हाईड्रो र ग्रिन डेभलपमेन्ट बैंकको सेयरमूल्यमा अपर सर्किट लाग्यो ।  

यस्तै मनकामना इन्जिनियरिङको सेयरमूल्य ८.३० प्रतिशत,मातृभूमि लघुवित्तको ७.२४ र जोशी हाईड्रोको सेयरमूल्य ६.५७ प्रतिशतले बढ्यो ।  

बाराही हाईड्रोको सेयरमूल्य आज सर्वाधिक घट्यो । यो कम्पनीको सेयरमूल्यमा आज ७.३९ प्रतिशतको गिरावट आयो । विन नेपाल लघुवित्तको सेयरमूल्य पनि आज ३.१९ प्रतिशत र राँवा इनर्जीको सेयरमूल्य २.५४ प्रतिशतले घट्यो ।