विश्वका शीर्ष १० सेयर बजारमध्ये भारतको धितोपत्र बजार पूँजीकरण सर्वाधिक वृद्धि

काठमाण्डौ । भारतको धितोपत्र बजार पूँजीकरण २१ प्रतिशतभन्दा बढीले बढेको छ । जुन विश्वका शीर्ष १० इक्विटी बजारहरूमध्ये सबैभन्दा बढी हो। यससँगै भारत  विश्वको पाँचौं ठूलो इक्विटी बजार बनेको छ।

अहिले अमेरिका, चीन, जापान र हङकङ भारतभन्दा अगाडि छन् । यस अवधिमा भारतको बेन्चमार्क सूचकांक, सेन्सेक्स र निफ्टी क्रमशः १२.५ प्रतिशत र १३.५ प्रतिशतले बढेको छ। अक्टोबर २०२४ र फेब्रुअरी २०२५ को बीचमा पाँच महिनाको सुधार पछि स्टक बजारमा बलियो र्यालीका कारण मार्चदेखि भारतको मार्केट क्याप १ ट्रिलियनले बढेको छ। यो विश्वको शीर्ष १० इक्विटी बजारहरूमा सबैभन्दा उच्च वृद्धि हो।

भारतका सूचीकृत कम्पनीहरूले मार्च २०२५ को सुरुदेखि बजार पूँजीकरणमा १ ट्रिलियन डलर थपेका छन् । जसपश्चात कुल पूँजीकरण ५.३३ ट्रिलियन डलर पुगेको छ । अमेरिका र चीनबीचको व्यापार वार्ता र एफपीआई कोष प्रवाहका कारण विश्व बजारमा लाभ उठ्ने आशाका बीच भारतको घरेलु बजार बलियो बन्न पुगेृको हो ।