चार साता लगातार घटेको बजार यो साता बढ्यो, नेप्सेको चार्टमा ‘बुलिस स्पिनिङ’ क्याण्डल

काठमाण्डौ । यो साता पनि सेयर बजारमा ५ दिन सेयर कारोबार भयो । यो साता ५ दिनको कारोबारमा ३ दिन नेप्से बढ्यो भने २ दिन मात्रै घट्यो  ।  

अघिल्लो साता २ हजार ७५८ को बिन्दुमा बन्द भएको बजार यो साता २ हजार ७८१ को बिन्दुमा बन्द भयो । यस हिसाबले यो साता २३ अंकले बजार बढ्यो, अघिल्लो साता चाहिँ त्यसअघिको साताको तुलनामा बजार ३०.३९ अंकले घटेको थियो  । 

यो साता दोस्रो बजारमा ५ दिनको कारोबारमा ३२.२६ अर्बको सेयर कारोबार भयो । अघिल्लो साता २९.७७ अर्बको सेयर कारोबार भएको थियो । यस हिसाबले यो साता बजारमा कारोबार र सूचक दुबैमा बढोत्तरी भयो । यो साता बजार बढ्दा बजार पूँजीकरण ४६.४७ खर्ब रह्यो ।  अघिल्लो साता यस्तो कारोबार ४६ खर्ब ८ अर्ब रहेको थियो । यस हिसाबले यो साता बजार बढ्दा लगानीकर्ताहरुको सम्पत्ति ३९ अर्बले बढ्यो ।  

क्याण्डल स्टिकको आधारमा  

यो साता साप्ताहिक रुपमा स्पिनिङ टप क्याण्डल बनेको छ । स्पिनिङ टप क्याण्डल भनेको आफैंमा एक अनिर्णयको क्याण्डल मानिन्छ । यो क्याण्डललाई रिभर्सल क्याण्डल पनि भनेर बुझिन्छ । यदि लामो समयको बढ्दो बजारमा यस्तो क्याण्डल बन्छ भने यसले बजार तल जाने संकेत गर्छ । तर यदि घट्दो बजारमा यस्तो क्याण्डल बन्छ भने यसले बजार माथि जाने संकेत गर्छ । तर यसको निश्चितताका लागि अर्को क्याण्डलको कन्फरमेसन पछि मात्रै बजारको दिशा निक्र्यौल गर्न सकिन्छ ।  

साप्ताहिक रुपमा हाल नेप्सेमा बनेको क्याण्डल ४ साता लगातार घटेको बजारमा यस्तो क्याण्डल बनेको कारण सम्भावित रुपमा बजारले अप ट्रेन्डको सम्भावना रहन्छ । जसलाई यो साताको कारोबारले पनि पुष्टि गर्छ । यो साता बजार बढ्दा कारोबारमा पनि सुधार आएको देखिन्छ ।  

(माथि मुख्य तस्विरमा हेर्नुस्)

मुभिङ एभरेजको आधारमा  

यो साता नेप्सेले ५० दिने मूभिङ एभरेज रेखामा सपोर्ट लिएको छ । (हेर्नुहोस तस्बिरमा )मुभिङ एभरेज रेखाले घट्दो बजारमा सपोर्ट र बढ्दो बजारमा प्रतिरोधको काम गर्छ । अघिल्लो साता यो रेखाबाट माथि लागेको रेखाले यो साता सपोर्टको काम गरेको देखिन्छ ।  

 

बोलिङ्गर ब्याण्ड, म्याक्डी र आरएसआई  

साप्ताहिक रुपमा बोलिङ्गर ब्याण्डलबाट नियाल्दा यो साता बजारले मध्यब्याण्डमा सपोर्ट लिएको देखिन्छ । म्याक्डीमा बुलिस क्रसओभर भ्यालिड नै रहेको छ, तर हिस्टोग्राम फिक्का र छोटा छोटा हुँदै गरेको देखिन्छ । साप्ताहिक रुपमा आरएसआई न्यूट्रल जोन माथि नै चलेको देखिन्छ ।  

पिभट प्वाइन्ट   

पिभट विश्लेषण भनेको सेयर तथा डेरिभेटिभको अधिकतम, न्यूनतम र अन्तिम मूल्यलाई आधार मानी यसको भविष्यमा हुने मूल्यको उतारचढाव निकाल्ने विधि हो । यही विधिअनुसार हेर्दा अब बजारको सम्भावना यस्तो देखिन्छ :

बढेमा प्रतिरोध  

प्रतिरोध ३ – २८३६

प्रतिरोध २ – २८१९

प्रतिरोध १–  २७८८

पिभट प्वाइन्ट: २७७२

 

घटेमा सपोर्ट 

सपोर्ट १– २७४१

सपोर्ट २– २७२५

सपोर्ट  ३ –२६९४

निश्कर्ष: यो साता लगातार ४ साता गिरावट आएको बजारमा ब्रेक लाग्यो । यो साता बजार बढ्दा कारोबार पनि बढेको छ । मूभिङ एभरेज रेखाबाट नियाल्दा यो साता बजार ५० दिने रेखाभन्दा माथि टिकेको देखिन्छ । मनी फ्लो इन्डेक्सबाट नियाल्दा ओभरसोल्ड जोनबाट फर्केर हाल २५ को तहमा चलेको देखिन्छ । बजारलाई डाउ थेउरीबाट डेलीबेसमा नियाल्दा साताको अन्तिम कारोबारमा एउटा हायर लो बनाउन खसेको सम्भावना रहन्छ । आरएसआई पनि बढ्दो गतिमा ४६ को तहमा चलेको देखिन्छ । यसरी विभिन्न इन्डिकेटरबाट नियाल्दा बजारले एउटा करेक्सन सकेर यूटर्न लिँदै गरेको मान्न सकिन्छ ।  

(नोट : सेयर बजारमा लगानी जोखिमपूर्ण हुन्छ, यो विश्लेषण कारोबारका लागि सिफारिस भने होइन ।)