गत वर्ष सेयरधनीलाई निराश बनाएको माछापुच्छ्रे यो वर्ष बन्यो लाभांश घोषणा गर्ने पहिलो वाणिज्य बैंक

काठमाण्डौ । गत आर्थिक वर्षको नाफाबाट सेयरधनीलाई लाभांश घोषणा गर्ने पहिलो बैंक बनेको छ माछापुच्छ्रे बैंक । यो बैंकले शुक्रबार ८ प्रतिशत लाभांशको घोषणा गरेको हो ।  

शुक्रबार बसेको बैंक सञ्चालक समितिको बैठकले सेयरधनीका लागि ४ प्रतिशत बोनस सेयर र ४ प्रतिशत नगद लाभांश(कर प्रयोजनसहित) गरी कुल ८ प्रतिशत लाभांश वितरणको घोषणा गरेको हो । 

बैंकको सञ्चालक समितिले गरेको यो निर्णय नियामक नेपाल राष्ट्रबैंकबाट स्वीकृत भएपछि र कम्पनीको आगामी वार्षिक साधारणसभाबाट पारित भएपछि सेयरधनीले लाभांश पाउनेछन्।

राष्ट्रबैंकले मौद्रिक नीतिबाट गरेको कतिपय लचक व्यवस्थाका कारण वाणिज्य बैंकहरुको वासलातमा अघिल्लो वर्षको तुलनामा सुधार भएको थियो । परिणामस्वरुप अधिकांश बैंकहरुको लाभांश क्षमता बढेको थियो । यही क्रममा माछापुच्छ्रेको पनि लाभांश क्षमता बढेकै कारण ८ प्रतिशत लाभांश घोषणा भएको हो । 

आर्थिक वर्ष २०८०/८१ मा बैंकले वितरणयोग्य नाफा रकम ऋणपत्रको भुक्तानी कोषमा जम्मा गर्ने निर्णय गरेको थियो । आर्थिक वर्ष २०७९/८० मा चाहिँ बैंकले १३.३० प्रतिशत बोनस सेयर दिएको थियो ।  

आर्थिक वर्ष २०८१/८२ को अपरिस्कृत वित्तीय विवरण प्रकाशित हुँदा बैंकको लाभांश क्षमता ९.२३ प्रतिशत थियो ।