सुनको मूल्यमा लगातार उछाल: सन् २०२६ भित्र १० ग्रामकै मूल्य रु. ३ लाख माथि पुग्नसक्ने !

काठमाण्डौ । विश्व बजारमा सुनको मूल्य ऐतिहासिक उचाइमा पुगेपछि यसको प्रत्यक्ष असर नेपालमा देखिएको छ।  

हाल नेपालमा १० ग्राम सुनको मूल्य १ लाख ९० हजार ७० रुपैयाँ पुगेको नेपाल सुनचाँदी व्यवसायी महासंघले जनाएको छ।

अन्तर्राष्ट्रिय एजेन्सी र ठूला बैंकहरूले आगामी वर्षमा सुनको मूल्य अझै बढ्ने प्रक्षेपण गरेका छन्। HSBC ले २०२५ मा प्रतिऔंस करिब ३,२१५ अमेरिकी डलर रहने अनुमान गरेको छ भने JP Morgan र Goldman Sachs ले २०२६ सम्म सुन ४,००० डलर नाघ्ने प्रक्षेपण गरेका छन्। 

यस्तै, आक्रामक परिदृश्यमा प्रतिऔंस ५,००० डलरसम्म पुग्ने सम्भावना औंल्याइएको छ।

नेपालमा मूल्य कहाँ पुग्ला ?

विश्व बजारको हालको ट्रेन्डलाई आधार मान्दा नेपालमा १० ग्राम सुनको मूल्य २०२५ अन्त्यसम्म २ लाख ३० हजारदेखि २ लाख ५० हजार रुपैयाँसम्म पुग्न सक्ने अनुमान गरिएको छ। यदि प्रतिऔंस ५,००० डलर पुग्ने परिदृश्य सोच्ने हो भने, २०२६ भित्रै नेपालमा १० ग्राम सुन ३ लाख रुपैयाँ नजिक पुग्ने सम्भावना पनि देखिन्छ।

मूल्य बढाउने कारणहरू

-अमेरिकी केन्द्रीय बैंकले ब्याजदर कटौतीको संकेत दिनु

-विश्वव्यापी भू-राजनीतिक तनाव

-मुद्रास्फीति नियन्त्रणमा अनिश्चितता

-केन्द्रीय बैंकहरूले निरन्तर सुन खरिद गर्दै जानु

बजारमा असर

नेपालमा विवाह, चाडपर्व र परम्परागत भण्डारणमा सुनको माग अत्यधिक हुने भएकाले अन्तर्राष्ट्रिय बजारको उतार–चढाव सिधै महसुस हुन्छ। मूल्य लगातार बढ्दै गएपछि सर्वसाधारणका लागि सुन खरिद झन् कठिन बन्ने अनुमान छ।