सामसङ ग्यालेक्सी S25 FE : नेपालमा बिक्री भइरहेको समस्याग्रस्त फोन !

काठमाण्डौ । सामसङको बहुप्रचारित ‘फ्यान एडिसन’ सिरिजको पछिल्लो मोडल ग्यालेक्सी S25 FE नेपालमा गत असोज महिनादेखि बिक्री भइरहेको छ।  

मूल्य ८९,९९९ रुपैयाँदेखि सुरु भएको यो फोनलाई ‘महँगो फिचर सस्तो मूल्यमा’ भन्दै बजारमा ल्याइएको थियो। तर, यो फोन किनेका सयौं नेपाली उपभोक्ताले अहिले गम्भीर समस्या भोगिरहेका छन् । ब्याट्री चाँडै सकिने, फोन तात्ने, क्यामेरा खराब हुने, ल्याग हुने र महँगो मूल्यमा पनि प्लास्टिक बडी दिने जस्ता गुनासा दिनदिनै बढ्दै छन्।

हाम्रो टोलीले काठमाडौं, पोखरा, वीरगञ्ज र विराटनगरका ५० जना S25 FE प्रयोगकर्तासँग कुराकानी गर्‍यो। त्यसमध्ये ७८ प्रतिशतले यो फोन किनेर पैसा खेर गएको गुनासो गरे ।  

१. ब्याट्रीमा गम्भीर समस्या

उपभोक्ता राजेश श्रेष्ठले भने-“बिहान १००% चार्ज गरेर निस्कन्छु, दिउँसो २ बजेसम्ममा १५-२०% मात्र बाँकी हुन्छ। फेसबुक, युट्युब चलाउँदा त फोन तात्छ अनि ब्याट्री झन् चाँडो सकिन्छ।” 

सामसङले ४,९०० एमएएचको ब्याट्री र ४५ वाट चार्जिङ भनेको थियो, तर नेपालमा बिक्री भएका धेरै युनिटमा २५ वाटभन्दा माथि चार्ज नै हुँदैन। त्रिपुरेश्वरका मोबाइल मर्मत technician सागर तामाङ भन्छन्-“पछिल्लो एक महिनामा S25 FE को ब्याट्री र चार्जिङ समस्या लिएर ३० वटा फोन आइसके।”

२. क्यामेरा : प्रचार र वास्तविकताबीच ठूलो अन्तर

सामसङले ५० मेगापिक्सेल मुख्य क्यामेरा र नयाँ १२ मेगापिक्सेल सेल्फी क्यामेराको ठूलो विज्ञापन गर्‍यो। तर रातिको फोटो खिच्दा ‘न्वाइज’ (धमिलो कण) देखिने, रंग बिग्रने र फोकस नमिल्ने समस्या व्यापक छ। पोखराकी सृष्टि कार्की भन्छिन्-“मेरो पुरानो ग्यालेक्सी A54 ले रातमा राम्रो फोटो खिच्थ्यो, यो महँगो फोनले त बिगार्छ।”

३. फोन तात्ने र सुस्त हुने

गेम खेल्ने र भिडियो रेकर्ड गर्नेहरूले फोन ४५-५० डिग्रीसम्म तात्ने र आफैं सुस्त हुने गुनासो गरेका छन्। काठमाडौंका गेमर आयुषमान भण्डारीले भने-“PUBG खेल्दा १५ मिनेटमै फ्रेम ड्रप हुन्छ, फोन जलेजस्तो तात्छ।”

४. प्लास्टिक बडी र महँगो मूल्यको आलोचना

९० हजारको फोनमा पनि प्लास्टिक फ्रेम र पछाडि प्यानल राखिएकोमा उपभोक्ता रुष्ट छन्। ९० हजारमा त ग्यालेक्सी S23 पनि पाइन्छ, त्यो फोन पूरै ग्लास र एलुमिनियमको छ। S25 FE ले मूल्य र गुणस्तरमा ठगेजस्तो लागेको यसका प्रयोगकर्ताहरु गुनासो गर्छन ।  

हामीले सामसङ नेपालका केही आधिकारिक प्रतिनिधिहरुसँग कुरा गर्दा उनीहरुले भनेका छन्-“केही युनिटमा सफ्टवेयर समस्या भएको स्वीकार गर्छौं। डिसेम्बरभित्र नयाँ अपडेट आउँदैछ जसले ब्याट्री, क्यामेरा र तात्ने समस्या समाधान गर्नेछ। हाम्रा सबै सेवा केन्द्रमा निःशुल्क अपडेट र जाँच सुविधा छ।”

तर उपभोक्ताले भन्छन्-“अपडेट आएर पनि समस्या समाधान नभए हामी सामूहिक उजुरी गर्नेछौं।”

यसरी ग्यालेक्सी S25 FE नेपालमा बिक्री भएको दुई महिना नपुग्दै यो फोन ‘सबैभन्दा धेरै गुनासो आएको मोडल’ बन्न पुगेको छ।  

महँगो मूल्यमा कमजोर ब्याट्री, खराब क्यामेरा र तात्ने समस्या दिएर सामसङले नेपाली उपभोक्ताको विश्वासमाथि ठेस पु¥याएको देखिन्छ।

यदि तपाईं यो फोन किन्ने सोचमा हुनुहुन्छ भने कम्तीमा जनवरीसम्म पर्खनुहोस्, नयाँ अपडेट आएपछि मात्र निर्णय लिनुहोस्। नत्र तपाईंको ९० हजार रुपैयाँ ‘समस्याको प्याकेज’ मा परिणत हुन सक्छ।