सेयरबजारको वृद्धिमा लाग्यो ब्रेक, जानकार भन्छन्, ‘सामान्य नाफा बुक मात्रै हो’

काठमाण्डौ । गत साताभर बढेको सेयरबजारमा आज करेक्सन आएको छ । साताको पहिलो कारोबार दिन नेपाल स्टक एक्सचेञ्च (नेप्से) परिसूचक ०.९९ प्रतिशत अर्थात २६.५१ अंकले घटेर २ हजार ६४९.५१ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि १.०१ प्रतिशतले घटेर ४५६.९८ विन्दुमा पुगेको छ । यो दिन नेप्सेमा सूचीकृत मध्ये ३४२ वटा स्क्रिप्टको १ करोड ५७ लाख ३६ हजार ३त्७२ कित्ता सेयर ७ अर्ब ८ करोड रुपैयाँभन्दा बढीको कारोबार भएको  छ । आजको कारोबार अघिल्लो दिनको तुलनामा केही कम हो । अघिल्लो दिन भने ६ अर्ब ६६ करोड रुपैयाँभन्दा बढीको कारोबार भएको थियो ।

आजको बजारबारे बजार जानकार टेकेन्द्र थपलिया भन्छन्, ‘गत साताभर बजार बढेका कारण आज केही नाफा बुक भएको देखिन्छ । जसका कारण आज बजार घट्न पुग्यो । बढिरहेको बजारमा नाफा बुक हुनु सामान्य हो । एकोहोरो बढ्ने बजारभन्द बेलाबेलामा हुने यस्तो नाफा बुकले बजारलाई थप मजबुत बनाउँछ ।’

सबै विषयवस्तु सकारात्मक भएकाले आगामी कारोबारदेखि बजारले पुनः माथिको लय समात्ने उनले विश्वास व्यक्त गरे ।  

यो दिन नेप्सेमा सूचीकृत १३ वटा समूहमध्ये २ वटा बाहेक अन्य सबैमा रातो पोतियो । आज उत्पादन तथा प्रशोधन र म्युचुअल फण्ड समूह मात्रै बढे । यी समूहहरु क्रमशः०.७३ र ०.०४ प्रतिशतले बढे ।

लगानी समूह आज सर्वाधिक अर्थात १.४८ प्रतिशतले घट्यो ।

यस्तै बेंकिङ समूह १.०८ प्रतिशत, विकास बैंक १.०९, फाइनान्स ०.८३, होटल ०.२९, हाईड्रो १.३१, जीवन बीमा १.२०, लघुवित्त १.३०, निर्जीवन ०.६९, अन्य १.०४ र व्यापार समूह ०.५१ प्रतिशतले घट्यो ।

धेरै कारोबार गर्ने कम्पनीहरु

यो दिन हिमालयन रि इन्स्योरेन्सको सर्वाधिक सेयर कारोबार भयो । आज यो कम्पनीको २३ करोड ५ लाख बढीको सेयर कारोबार भयो ।

यस्तै जोशी हाईड्रो २१ करोड ८१ लाख, ग्रिन भेन्चर्सको २१ करोड ३५ लाख, एनआरएन इन्फ्रास्ट्रक्चरको २१ करोड २४ लाख, नेपाल लाइफको १८ करोड ६५ लाख बढीको सेयर कारोबार भयो ।

धरै कमाउने र गुमाउने कम्पनीहरु

आज नेप्सेमा कारोबार भएका ५ वटा कम्पनीको सेयरमूल्यमा अपर सर्किट लाग्यो । आज सागर डिष्टिलरी, निफ्रा ग्रिन इनर्जी डिबेञ्चर, झापा इनर्जी, श्रीनगर एग्रोटेक र स्वस्तिक लघुवित्तको सेयरमूल्यमा अपर सर्किट लाग्यो ।  

यस्तै हिमस्टार उर्जाको सेयरमूल्य ४.८७ प्रतिशत र ट्रेड टावरको सेयरमूल्य ३.३६ प्रतिशतले बढ्यो ।

यो दिन जोशी हाईड्रोको सेयरमूल्य सर्वाधिक अर्थात ७.२९ प्रतिशतले घट्यो ।  

यस्तै हिमाल दोलखा हाईड्रोको सेयरमूल्य ५.५९, स्वेत गंगा हाइड्रोको ५.०७ र हिमालयन हाईड्रोको सेयरमूल्य ४.९४ प्रतिशतले घट्यो ।