बीमा कम्पनीहरुको लाभांश सिजन सुरु, सुखद् ओपनिङ हुँदा अधिकांशले नगदमा जोड दिने सम्भावना

काठमाण्डौ । बीमा कम्पनीहरुको लाभांश घोषणा हुन सुरु भएको छ । नेप्सेमा सूचीकृत अन्य कम्पनीहरुको तुलनामा बीमा कम्पनीहरुले ढिलै लाभांश प्रस्ताव गर्ने गर्दछन् ।  

हालसम्म गत आवको वितरणयोग्य मुनाफाबाट लाभांश प्रस्ताव गर्नेमा ५ कम्पनी मात्रै छन् । जीवन बीमातर्फ सिटिजन लाइफ, आइएमई लाइफ र नेपाल लाइफ छन् भने निर्जीवनतर्फ सिद्धार्थ प्रिमियर र आइजीआई प्रुडेन्सियल इन्स्योरेन्स रहेका छन् ।  

गत आवको मुनाफाबाट लाभांश प्रस्ताव गरेका ५ बीमा कम्पनीले उत्कृष्ट लाभांश घोषणा गरेका छन् । बीमा कम्पनीहरुको लाभांश सिजन सुरु भएलगत्तै राम्रो सुरुवात भएको छ । लाभांश प्रस्ताव गर्ने सबै कम्पनीले नगद लाभांशलाई नै जोड दिएका छन् । नेपाल लाइफ इन्स्योरेन्स बाहेक सबै कम्पनीले नगद लाभांश मात्रै प्रस्ताव गरेका छन् भने नेपाल लाइफले पनि बोनस भन्दा बढी नगदमा नै जोड दिएको छ ।  

जीवन बीमातर्फ नेपाल लाइफले गत आवको मुनाफाबाट १६ प्रतिशत बोनस सेयर र ५ प्रतिशत नगद लाभांश ९कर सहित० गरी कुल २१।०५ प्रतिशत लाभांश प्रस्ताव गरेको छ । त्यस्तै, सिटिजन लाइफले २० प्रतिशत नगद लाभांश, आइएमई लाइफले १०।५२६३ प्रतिशत नगद लाभांश निर्जीवनतर्फ सिद्धार्थ प्रिमियर इन्स्योरेन्सले २५ प्रतिशत नगद लाभांश र आइजीआई प्रुडेन्सियल इ्रन्स्योरेन्सले ५ प्रतिशत नगद लाभांश प्रस्ताव गरेका छन् ।

समग्रमा बीमा कम्पनीहरुको प्रस्तावित लाभांश ओपनिङमा सुखद् देखिएको छ । सूचीकृत कम्पनीहरुमा बैंक तथा वित्तीय संस्था र अन्य कम्पनीहरुको लाभांशदर खस्किँदै गइरहेकोमा बीमा कम्पनीहरुले भने नगद नै दिएपनि सुखद् ओपनिङ गरेका छन् ।  

लाभांश घोषणा गरिसकेका ५ बीमा कम्पनीको नेपाल बीमा प्राधिकरणले तोकेको चुक्तापुँजी पुगिसकेको छ । प्राधिकरणका अनुसार जीवन बीमा कम्पनीले ५ अर्ब रुपैयाँ र निर्जीवन बीमा कम्पनीले साढे २ अर्ब रुपैयाँ चुक्तापुँजी पुर्याउनुपर्नेछ । पूँजी पुगिसकेका कारण बीमा कम्पनीहरु नगद लाभांशमा जोड दिन थालेका छन् ।

नेप्सेमा सूचीकृत जीवन बीमातर्फ सबै कम्पनीको तोकिएको पूँजी पुगिसकेको छ भने  निर्जीवनतर्फ युनाइटेड अजोड, प्रभु इन्स्योरेन्स, राष्ट्रिय बीमा कम्पनी र सानिमा जिआइसी इन्स्योरेन्सको पूँजी अझै पुगेको छैन । अपुग पूँँजी भएका चार निर्जीवन बीमा कम्पनीहरुमा युनाइटेड अजोड र सानिमा जिआइसी हकप्रद निष्कासनको तयारीमा छन् भने राष्ट्रिय बीमा कम्पनी र प्रभु इन्स्योरेन्सले कुनै पनि योजना बनाएका छैनन् ।

बीमा कम्पनीहरुको लाभांश घोषणको सेनारियो हेर्दा अधिकांश बीमा कम्पनीले नगद लाभांशमा नै जोड दिने देखिन्छ । निर्जीवन बीमा कम्पनीहरुले आर्जित मुनाफाबाट केही प्रतिशत रकम लाभांश बाँड्नको लागि छुट्याएका हुन्छन् भने जीवन बीमा कम्पनीहरुले यस्तो रकम छुट्याएपनि एक्चुरियल भ्यालुएसनपछि मात्रै लाभांश तय हुन जान्छ ।