हालसम्म एक दर्जन बीमा कम्पनीको लाभांश घोषणा, अधिकांशको नगदमा जोड

काठमाण्डौ । हालसम्म एक दर्जन बीमा कम्पनीले लाभांश घोषणा गरेका छन् । जसमा ७ जीवन बीमा कम्पनी र ४ निर्जीवन बीमा कम्पनी रहेका छन् ।

यस वर्ष बीमा कम्पनीहरु समयमा लाभांश घोषणा गरी साधारण सभा गर्ने तरखरमा देखिएका छन् । गत वर्ष समयमै साधारण सभा गर्न नसक्दा नेपाल बीमा प्राधिकरणले केही कम्पनीहरुलाई जरिवाना लगाएको थियो । सोही कारण यस वर्ष बीमा कम्पनीहरु धमाधम लाभांश घोषणा गरी समयमै साधारण सभा गरिसक्ने तयारीमा लागिपरेका छन् ।

लाभांश घोषणा गर्ने जीवन बीमा कम्पनीहरुमा नेपाल लाइफ, सिटिजन लाइफ, आइएमई लाइफ, नेशनल लाइफ, सानिमा रिलायन्स लाइफ, सन नेपाल लाइफ र प्रभु महालक्ष्मी लाइफ रहेका छन् ।

जीवन बीमातर्फ सबैभन्दा धेरै लाभांश प्रस्ताव गर्ने कम्पनीमा नेपाल लाइफ इन्स्योरेन्स हरेको छ । कम्पनीले ५ प्रतिशत बोनस सेयर र १६.०५ प्रतिशत नगद लाभांश गरी कुल २१.०५ प्रतिशत लाभांश प्रस्ताव गरेको छ ।

त्यस्तै, निर्जीवन बीमा कम्पनीहरुमा सिद्धार्थ प्रिमियर, नेपाल इन्स्योरेन्स, शिखर इन्स्योरेन्स र आइजीआई प्रुडेन्सियल इन्स्योरेन्स छन् । निर्जीवन बीमा कम्पनीमा सबैभन्दा बढी लाभांश प्रस्ताव गर्नेमा सिद्धार्थ प्रिमियर इन्स्योरेन्स रहेको छ । कम्पनीले २५ प्रतिशत नगद लाभांश प्रस्ताव गरेको छ ।

लाभांश घोषणा गर्ने अधिकांश बीमा कम्पनीहरुले नगदमा बढी जोड दिएका छन् । ११ बीमा कम्पनीमध्ये ४ वटाले मात्रै बोनस सेयर दिने प्रस्ताव गरेका छन् भने ७ कम्पनीले नगद लाभांश मात्रै प्रस्ताव गरेका छन् ।

साथै उक्त कम्पनीहरु मध्ये तीनवटा कम्पनीले बुकक्लोजको मिति तोकिसकेका छन् । जसमा सिटिजन लाइफ, आइएमई लाइफ र नेपाल लाइफ छन् । सोमध्ये आइएमई लाइफ र नेपाल लाइफले साधारण सभा समेत आह्वान गरिसकेका छन् ।