जीवन बीमा कम्पनीहरुले आर्जन गरे रु. ७६.९० अर्ब बीमाशुल्क, नेपाल लाइफले मात्रै २१%

काठमाण्डौ । जीवन बीमा कम्पनीहरुले करिब ७७ अर्ब रुपैयाँ बराबरको बीमाशुल्क आर्जन गरेका छन् । नेपाल बीमा प्राधिकरणका अनुसार १४ बीमा कम्पनीले चालु आवको ५ महिनासम्ममा ७६ अर्ब ९० करोड ५७ लाख रुपैयाँ बराबरको प्रिमियम संकलन गरेका हुन् । यो बीमाशुल्क गत आवको सोही अवधिसम्मको तुलनामा १६.९० प्रतिशत बढी हो । 

गत आवको यसै अवधिसम्म जीवन बीमकहरुले ६५ अर्ब ७४ करोड १८ लाख रुपैयाँ बराबारको प्रिमियम संकलन गरेका थिए । सो अवधिसम्म आइपुग्दा सबै बीमा कम्पनीको व्यवसाय गत आवको तुलनामा उल्लेख्य बढेको देखिएको छ । सबैभन्दा धेरै बीमाशुल्क आर्जन गर्ने कम्पनीमा नेपाल लाइफ इन्स्योरेन्स रहेको छ । कम्पनीले २१ अर्ब ३७ करोड ४१ लाख रुपैयाँ प्रिमियम संकलन गरेको छ । 

यो बीमाशुल्क गत आवको तुलनामा १३.९१ प्रतिशत बढी हो । नेपाल लाइफले मात्रै सो अवधिसम्म संकलन गरेको प्रिमियम रकम सबै बीमकको कुल व्यवसायको २१.१९ प्रतिशत हिस्सा हो । 

त्यस्तै, नेशनल लाइफ इन्स्योरेन्सले पनि ९ अर्ब २७ करोड रुपैयाँ बराबरको प्रिमियम कलेक्सन गरेको छ । कम्पनीको यो व्यवसाय गत आवको तुलनामा १६.०७ प्रतिशत बढी हो । 

यसका साथै लाइफ इन्स्योरेन्स कर्पोरेशन नेपालले ८ अर्ब १८ करोड, हिमालयन लाइफले ६ अर्ब ९२ करोड, राष्ट्रिय जीवन बीमा कम्पनीले ५ अर्ब ५७ करोड, सूर्यज्योति लाइफले ४ अर्ब ४७ करोड, एशियन लाइफले ३ अर्ब ७५ करोड, सानिमा रिलायन्स लाइफले २ अर्ब ८० करोड, मेट लाइफ इन्स्योरेन्सले २ अर्ब ६३ करोड, आइएमई लाइफले २ अर्ब ४५ करोड, रिलायबल नेपाल लाइफले २ अर्ब ३४ करोड, प्रभु महालक्ष्मी लाइफले २ अर्ब २२ करोड र सन नेपाल लाइफले १ अर्ब ६४ करोड रुपैयाँ बराबरको प्रिमियम संकलन गरेका छन् । 

गतको तुलनामा सबैभन्दा बढी व्यवसाय बृद्धि गर्नेमा राष्ट्रिय जीवन बीमा कम्पनी रहेको छ । यो कम्पनीको व्यवसाय १४६.९४ प्रतिशत बढेको छ ।