फाइनान्स कम्पनीहरुको ब्यालेन्स्ड सिट कमजोर बन्दै, ९ ले व्यहोरे झण्डै ४८ करोड घाटा

काठमाण्डौ । फाइनान्स कम्पनीहरुले झण्डै २६ करोड घाटा ब्यहोरेका छन् । नेपाल राष्ट्र बैंकका अनुसार चालु आवको ५ महिनासम्ममा १५ फाइनान्स कम्पनीले २५ करोड ९६ लाख रुपैयाँ घाटा ब्यहोरेका हुन् ।

गत आवको सोही अवधिसम्म भने फाइनान्स कम्पनीहरुले ३१ करोड २९ लाख रुपैयाँ नाफा कमाएका थिए । सो अवधिसम्म आइपुग्दा अधिकांश कम्पनीहरु घाटामा देखिएका छन् । ६ कम्पनी मात्रै नाफामा उक्लिँदा ९ कम्पनीले घाटा ब्यहोरेका छन् । गत आवको सोही अवधिसम्म भने ७ कम्पनी मात्रै घाटामा देखिएका थिए ।

जेनजी आन्दोलनपश्चात् बैंक वित्तीय संस्थाहरुको कर्जा असुली प्रभावित बन्दा नाफामा प्रतिकुल असर देखिएको हो । घाटामा रहेका ९ फाइनान्स कम्पनीले मात्रै सो अवधिसम्म ४७ करोड ९४ लाख रुपैयाँ घाटा ब्यहोरेका छन् ।

मंसिर मसान्तसम्म सबैभन्दा बढी नाफा कमाउनेमा आइसीएफसी फाइनान्स रहेको छ । यो कम्पनीले ६ करोड ४ लाख रुपैयाँ नाफा कमाएको छ । यो नाफा गत आवको सोही अवधिसम्मको तुलनामा ४२।९७ प्रतिशत कम हो ।

त्यस्तै, गुडविल फाइनान्सले ५ करोड ६२ लाख, मन्जुश्री फाइनान्सले ४ करोड ५ लाख, सेन्ट्रल फाइनान्सले ३ करोड ८० लाख, मल्टीपर्पस फाइनान्सले १ करोड ८७ लाख र श्री इन्भेष्टमेन्ट फाइनान्सले ५८ लाख रुपैयाँ नाफा कमाएको छ ।

सबैभन्दा धेरै घाटा ब्यहोर्ने कम्पनीमा भने रिलायन्स फाइनान्स रहेको छ । यो कम्पनीले १३ करोड ४२ लाख रुपैयाँ घाटा ब्यहोरेको छ ।

त्यस्तै, गोर्खाज फाइनान्सले १२ करोड ५५ लाख, नेपाल फाइनान्सले ५ करोड ८० लाख, बेष्ट फाइनान्सले ५ करोड ४६ लाख, समृद्धि फाइनान्सले ४ करोड ५९ लाख, प्रोग्रेसिभ फाइनान्सले २ करोड ४४ लाख, पोखरा फाइनान्सले १ करोड ६९ लाख, गुहेश्वरी मर्चेण्ट बैंक एण्ड फाइनान्सले १ करोड ६७ लाख र जानकी फाइनान्सले २७ लाख रुपैयाँ घाटा ब्यहोरेका छन् ।