नेप्सेमा दोहोरो अंकको गिरावट, विश्लेषक भन्छन्, ‘संसद पुनर्स्थापनाको हल्लाले दबाबमा बजार’

काठमाण्डौ । साताको तेस्रो कारोबार दिन सेयरबजारमा दोहोरो अंकको गिरावट आएको छ । नेपाल स्टक एक्सचेञ्च (नेप्से) परिसूचक ०.४६ प्रतिशत अर्थात १२.५८ अंकले घटेर २ हजार ६८३.१५ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स भने ०.५३ प्रतिशतले घटेर ४५६.७१ विन्दुमा झरेको छ । यो दिन नेप्सेमा सूचीकृत मध्ये ३२२ वटा स्क्रिप्टको १ करोड ८७ लाख ३ हजार १८३ कित्ता सेयर ८ अर्ब ६३ करोड १५ लाख बढीको सेयर कारोबार भयो । अघिल्लो दिन भने ८ अर्ब २२ करोड रुपैयाँ बढीको सेयर कारोबार भएको थियो ।

आजको बजारबारे नेपाल इन्भेष्टर फोरमका उपाध्यक्ष राजन लम्साल भन्छन्, ‘सेयरबजार लगानीकर्ताको सेन्टिमेन्टसँग कनेक्ट हुने भएकाले लगानीकर्तामा कन्फिडेन्ट नआएसम्म सेयरबजार बढ्न सक्दैन । पछिल्लो केही दिनयता संसद पुनर्स्थापना हुने हल्लाले बजारलाई प्रत्यक्ष प्रभाव पारिरहेको छ । एकापट्टी चुनावको माहोल र अर्कोतिर संसद पुनर्स्थापना हुने हल्लाले बजार अब के होला भन्ने खालको अन्योलता सिर्जना भएको छ । लगानीकर्ताहरुले वास्तवमै चुनाव खोजिरहेका छन् । नयाँ आउने सरकारले पूँजी बजारका लागि केही राम्रो गर्ला र स्थिर सरकारपछि लगानीको वातावरण राम्रो होला भन्ने लगानीकर्ताहरुमा आशा छ । राजनीतिक पक्ष राम्रो नहुँदासम्म सेयरबजारको मुभमेन्ट राम्रो बन्नै सक्दैन । केही दिनयता बजार घट्नुको कारण बजारमा ट्रेडरहरुले सेयर बेचेको पनि हुन सक्छ । एकदुई दिन बजार यस्तै रहेर बढ्न सक्ने आँकलन गर्न सकिन्छ ।’

यो दिन नेप्सेमा सूचीकृत १३ वटा समूहमध्ये ३ वटामा हरियाली छायो भने १० वटामा रातो पोतियो । आज होटल समूह सर्वाधिक बढ्यो । यो समूह आज १.७९ प्रतिशतले बढ्यो ।

यस्तै उत्पादन तथा प्रशोधन समूह ०.३७ र म्युचुअल फण्ड समूह १ प्रतिशतले बढ्यो ।  

फाइनान्स समूह आज सर्वाधिक अर्थात १.०९ प्रतिशतले घट्यो । बैंकिङ समूह पनि आज ०.६३ प्रतिशत, विकास बैंक ०.६१, हाईड्रो ०.९७, लगानी ०.५१, जीवन बीमा ०.३९, लघुवित्त ०.४२, निर्जीवन बीमा ०.३५, अन्य ०.५६ र व्यापार समूह ०.४६ प्रतिशतले घट्यो ।

धेरै कारोबार गर्ने कम्पनीहरु

आज एसवाई प्यानल नेपालको सर्वाधिक सेयर कारोबार भयो । आज यो कम्पनीको ५९ करोड २९ लाख बढीको सेयर कारोबार भयो ।

यस्तै, आँखुखोला जलविद्युतको ४१ करोड, युनियन हाईड्रोपावरको ३२ करोड २२ लाख, पिपुल्स पावरको २५ करोड ७ लाख र बन्दिपुर केवलकारको २४ करोड ६९ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका २ वटा कम्पनीको सेयरमूल्यमा अपर सर्किट लाग्यो । आज कालिञ्चोक दर्शन र एचएलआई लार्ज क्याप फण्डको सेयरमूल्यमा अपर सर्किट लाग्यो ।

पञ्चकन्या माई हाईड्रोको सेयरमूल्य पनि आज ५.१५ प्रतिशत, राँवा इनर्जीको ४.८७ र एसवाई प्यानलको सेयरमूल्य ४.८४ प्रतिशतले बढ्यो ।

आज सान्भी इनर्जीको सेयरमूल्यमा सर्वाधिक गिरावट आयो । यो कम्पनीको सेयरमूल्य ४.६३ प्रतिशतले घट्यो । यस्तै पियोर इनर्जीको सेयरमूल्य ४.५९ र शिवश्री हाईड्रोको सेयरमूल्य ४.०५ प्रतिशतले घट्यो ।