इम्पेयरमेन्ट चार्ज घटेसँगै आशा लघुवित्तको नाफामा ४३१% को उछाल

काठमाण्डौ । आशा लघुवित्त वित्तीय संस्था लिमिटेडले चालु आवको दोस्रो त्रैमाससम्ममा १२ करोड ५५ लाख रुपैयाँ खुद नाफा आर्जन गरेको छ । यो रकम अघिल्लो आवको सोहि अवधिको तुलनामा ४३१.५४ प्रतिशतले बढी हो । अघिल्लो आवको सोहि अवधिसम्म भने संस्थाले २ करोड ३६ लाख रुपैयाँ खुद नाफा आर्जन गरेको थियो ।  

खुद ब्याज आम्दानी बढ्नु र इम्पेयरमेन्ट चार्ज घट्नु जस्ता कारणले संस्थाको मुनाफामा उल्लेख्य वृद्धि देखिएको हो । दोस्रो त्रैमाससम्म संस्थाले ३८ करोड ७४ लाख रुपैयाँ खुद ब्याज आम्दानी गरेको छ । जुन अघिल्लो आवको सोहि अवधिको तुलनामा १३.९२ प्रतिशतले धेरै हो । अघिल्लो आवमा संस्थाले ३४ करोड १ लाख रुपैयाँ खुद ब्याज आम्दानी गरेको थियो ।

यस्तै संस्थाको इम्पेयरमेन्ट चार्ज पनि १३ करोड ८ लाख रुपैयाँबाट घटेर ७ करोड ९२ लाखमा सीमित बनेको छ ।

संस्थाको खुद शुल्क तथा कमिशन आम्दानी पनि बढेको छ । अघिल्लो आवमा ४ करोड ९४ लाख रुपैयाँ रहेको खुद शुल्क तथा कमिशन आम्दानी बढेर ६ करोड ४० लाख पुगेको छ ।  

संस्थाको रिटेन्ड अर्निङ ११०० प्रतिशतले बढेको छ । अघिल्लो आवको दोस्रो त्रैमाससम्म १ करोड १ लाख रुपैयाँ रहेको रिटेन्ड अर्निङ बढेर १२ करोड १७ लाख पुगेको छ । संस्थाको रिजर्भको आकार पनि ३४ करोड १३ लाख रुपैयाँबाट बढेर ३४ करोड ४४ लाख रुपैयाँ पुगेको छ ।  

अघिल्लो आवको दोस्रो त्रैमाससम्म २ अर्ब ९८ करोड रुपैयाँ रहेको निक्षेप संकलन बढेर ३ अर्ब ५५ करोड रुपैयाँ पुगेको छ । त्यस्तै कर्जा प्रवाह पनि ९ अर्ब ८६ करोड रुपैयाँबाट बढेर १० अर्ब ८० करोड रुपैयाँ पुगेको छ ।  

संस्थाको खराब कर्जा अनुपात बढेको छ । संस्थाको खराब कर्जा अनुपात ४.९२ प्रतिशतबाट बढेर १०.१५ प्रतिशत पुगेको छ । संस्थाको वितरणयोग्य मुनाफा १२ करोड १७ लाख रहेको छ । जुन अघिल्लो आवको तुलनामा ११००.८२ प्रतिशतले बढी हो । संस्थाको लाभांश क्षमता पनि १.३८ प्रतिशतबाट बढेर १५.१७ प्रतिशत पुगेको छ ।  

समीक्षा अवधिसम्म संस्थाको प्रतिसेयर आम्दानी(ईपीएस) ३१.२९ रुपैयाँ,प्रतिसेयर नेटवर्थ १५८.०८ रुपैयाँ,प्रतिसेयर कुल सम्पत्तिको मूल्य १ हजार ४६२.९३ रुपैयाँ,मूल्य आम्दानी अनुपात ३७.२३ गुणा र तरलता अनुपात ७.४६ प्रतिशत कायम भएको छ ।