यस्तो रहेछ ओलीलाई पक्रन ढिलाई भएको कारण

काठमाण्डौ । गत भदौ २३ गतेको जेनजी आन्दोलनमा दर्जनौ निहत्थाहरुको हत्या गरेको अभियोगमा उच्चस्तरीय छानबिन समितिबाट प्रमुख दोषी करार पूर्व प्रधानमन्त्री तथा एमाले अध्यक्ष केपी शर्मा ओली अझै पक्राउ परिसकेका छैनन् ।  

ओलीलाई हिजो मध्यरातिदेखि नै पक्राउ गर्ने प्रयास गरिएको भए पनि जरुरी पक्राउ पूर्जी लगायतका आवश्यक कागजात तयार गर्ने क्रममा केही ढिलाई हुँदा आज बिहानको राति मात्र प्रहरी टोली गुण्डुस्थित निवासमा पुगेको थियो । 

ओलीभन्दा केही ढिलो प्रक्रिया सुरु भए पनि पूर्व गृहमन्त्री रमेश लेखक पक्राउ परिसकेका छन् । लेखकलाई भक्तपुरको कटुञ्जेस्थित उनको निवासमै पुगेको प्रहरीले केहीबेरअघि पक्राउ गरिसकेको छ । उनलाई पक्राउ गरेर काठमाण्डौ प्रहरी परिसरमा ल्याइँदैछ ।  

उता, भक्तपुरकै गुण्डुस्थित केपी ओली निवासमा भने मध्यरातिदेखि नै ठूलो संख्यामा सुरक्षाकर्मी परिचालन गरिएको छ । नेपाल प्रहरीलाई सशस्त्र प्रहरीले समेत सहयोग गरिरहेको छ । सबैभन्दा बाहिरी घेरामा नेपाली सेनाले समेत निगरानी गरिरहेको स्रोतको भनाई छ । 

प्रहरी टोली ओलीलाई पक्राउ गर्न जरुरी पक्राउ पूर्जीसहित पुगे पनि हालसम्म पक्राउ पर्न सकेका छैनन् । हिजैदेखि गुण्डुमा रहेकी एमाले नेतृ रामकुमारी झाक्रीका अनुसार प्रहरी पुग्दा ओली सुतिसकेका थिए । राति २ बजे सुतेका ओली अझै उठेका छैनन् । ओलीलाई नियन्त्रणमा लिन खटिएका एक प्रहरी अधिकृतका अनुसार उठेपछि नियन्त्रणमा लिने तयारी भइरहेको छ ।  

ओलीलाई नियन्त्रणमा लिन ढिलाई हुँदा गुण्डुस्थित उनको निवास आसपास एमाले कार्यकर्ताहरु भेला हुने क्रम जारी छ ।