थामिएन सेयर बजारको गिरावट, कारोबार रकम पनि खुम्चियो

काठमाण्डौ । पछिल्लो समय निरन्तर खस्किरहेको सेयरबजारमा आजपनि गिरावट आएको छ । आज नेपाल स्टक एक्सचेञ्ज (नेप्से)परिसूचक १.२६ प्रतिशत अर्थात् ३४.६३ अंकले घटेर २ हजार ७०४.०८ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.७२ प्रतिशतले घटेर ४६१.०५ विन्दुमा झरेको छ।

आज नेप्सेमा सूचीकृत ३४१ वटा स्क्रिप्टका १ करोड ७४ हजार ५२४ कित्ता सेयर किनबेच हुँदा कुल कारोबार रकम ४ अर्ब २६ करोड ५३ लाख बढीको सेयर कारोबार भएको छ । गत शुक्रबार भने ४ अर्ब ९१ करोड ६६ लाख रुपैयाँ बढीको सेयर कारोबार भएको थियो ।  

आजको बजारबारे नेपाल इन्भेष्टर्स फोरमका अध्यक्ष तुलसीराम ढकाल भन्छन्, ‘बजार बढ्नका लागि सकारात्मक आधारहरु बनेपनि पछिल्लो समय बजार निरन्तर घटिरहेको छ । सेयर लगानीकर्ताहरुको मनोबल घटेकाले बजार माथि उक्लिन सकिरहेको छैन । विशेषगरी नेप्से र धितोपत्र बोर्डले कोल्याटरल सम्बन्धि ल्याएको नयाँ व्यवस्थाले लगानीकर्ताहरु निरुत्साहित बनेका छन्, जसकारण पछिल्लो समय सेयर कारोबार खुम्चिँदै गइरहेको छ । यो अवस्थाले लगानीकर्ताहरु ब्रोकरकै पैसाले मात्रै कारोबार गर्ने बानी परेको हो त भन्ने प्रश्न पनि उठ्न सक्छ ।’

उनले भने, ‘सरकारले सम्पत्ति शुद्धीकरण अनुसन्धानका लागि आयोग बनाएका छन्, यो विषयले पनि लगानीकर्ताहरु अहिले पर्ख र हेरको अवस्थामा छन् । लगानीकर्ताहरु अब सरकारको नीति तथा कार्यक्रमकै प्रतिक्षामा छन् । सेयरबजार सुधारका लागि दिगो हुने खालको नीति आउने लगानीकर्ताले अपेक्षा राखेका छन् । साथै बजेटमा पनि सरकारले अर्थतन्त्र सुधार्न र पूँजीबजारलाई दिगो बनाउने खालको बजेट ल्याउने आशा गरिएको छ । अहिले बजार सामान्य घटेपनि आत्तिहाल्नुपर्ने अवस्था भने छैन ।’

कुन समूहमा भयो कतिको थपघट ?

आज कारोबारमा आएका १३ वटा समूहमध्ये एउटा बाहेक अन्य सबैमा रातो पोतियो । आज लघुवित्त समूह मात्रै बढ्यो । यो समूह आज ०.०२ अंकले बढ्यो ।

यो दिन उत्पादन तथा प्रशोधन समूहमा सर्वाधिक गिरावट आयो । यो समूह आज २.५४ प्रतिशतले घट्यो ।

यस्तै बैंकिङ समूह ०.८६ प्रतिशत, विकास बैंक २.१४, फाइनान्स ०.९६, होटल १.३५, हाईड्रो २.२३, लगानी १.३६, जीवन बीमा ०.४९, म्युचुअल फण्ड ०.६२, निर्जीवन ०.९३, अन्य ०.४० र व्यापार १.३८ प्रतिशतले घट्यो ।  

सर्वाधिक कारोबार हुने कम्पनी

आज एनआरएन इन्फ्रास्ट्रक्चरको सर्वाधिक अर्थात ३१ करोड ३६ लाख बढीको सेयर कारोबार भयो । यस्तै रिलायन्स स्पिनिङ मिल्सको १७ करोड ९९ लाख, नेशनल हाईड्रोपावरको १५ करोड ५४ लाख, आँखु खोला जलविद्युतको १५ करोड १८ लाख र एनआईसी एशिया बैंकको ११ करोड ८९ लाख बढीको सेयर कारोबार भयो ।  

सर्वाधिक कमाउने र गुमाउने कम्पनी

आज कारोबारमा आएको एउटा कम्पनीको सेयरमूल्यमा मात्रै अपर सर्किट लाग्यो । आज फर्वार्ड माइक्रोफाइनान्सको सेयरमूल्य सर्वाधिक बढ्यो । यो कम्पनीको सेयरमूल्य आज १५ प्रतिशतले बढ्यो ।

यस्तै झापा इनर्जीको सेयरमूल्य ७.९९ प्रतिशत, सेञ्चुरी डिबेञ्चर २०८८ को मूल्य २.९८ र एनआईसी एशिया ग्रोथ फण्ड–२ को मूल्य २.७९ प्रतिशतले बढ्यो ।  

यो दिन कर्पोरेट डेभलपमेन्ट बैंकको सेयरमूल्य सर्वाधिक अर्थात १२.५८ प्रतिशतले घट्यो । माईखोला हाईड्रोको सेयरमूल्य पनि आज ८.५९ प्रतिशत र नारायणी डेभलपमे्न्ट बैंकको सेयरमूल्य ८.५६ प्रतिशतले घट्यो ।