नेष्डो समृद्ध लघुवित्त १४.२२ करोड नाफामा, लाभांश क्षमता ७०.५५% पुग्यो

काठमाण्डौ । नेष्डो समृद्ध लघुवित्त वित्तीय संस्था लिमिटेडले चालु आवको तेस्रो त्रैमाससम्म १४ करोड २२ लाख रुपैयाँ खुद नाफा आर्जन गरेको छ । अघिल्लो आवको सोही अवधिसम्म भने संस्था ११ करोड ६० लाख घाटामा थियो ।

आम्दानी बढेसँगै र इम्पेयरमेन्ट चार्ज रिभर्सल भएसँगै संस्था नाफा आर्जन गर्न सफल भएको हो ।

संस्थाको खुद ब्याज आम्दानी ५.६९ प्रतिशतले बढेको छ । संस्थाले २१ करोड ३६ लाख रुपैयाँबराबरको खुद ब्याज आम्दानी गरेको छ । अघिल्लो आवको समीक्षा अवधिसम्म संस्थाले २० करोड २१ लाख रुपैयाँ खुद ब्याज आम्दानी गरेको थियो । तेस्रो त्रैमाससम्म संस्थाको खुद सञ्चालन आम्दानी ३५ करोड ११ लाख र सञ्चालन मुनाफा २० करोड ३१ लाख रुपैयाँ रहेको छ । अघिल्लो आवमा भने संस्थाको सञ्चालन मुनाफा ११ करोड ६० लाख रुपैयाँले ऋणात्मक अवस्थामा थियो ।    

संस्थाको इम्पेयरमेन्ट चार्ज १ करोड ६ लाख रुपैयाँले रिभर्सल भएको छ । यो अवधिसम्म संस्थाको निक्षेप संकलन र कर्जा प्रवाह दुवै बढेको छ । अघिल्लो आवको तेस्रो त्रैमाससम्म २ अर्ब ४३ करोड निक्षेप संकलन गरेको संस्थाले समीक्षा अवधिसम्म भने २ अर्ब ४९ करोड रुपैयाँबराबरको निक्षेप संकलन गरेको छ।

यस्तै संस्थाले ३ अर्ब ७ करोड रुपैयाँबराबरको कर्जा प्रवाह गरेको छ । अघिल्लो आवको तेस्रो त्रैमाससम्म संस्थाले ३ अर्ब २ करोड रुपैयाँबराबरको कर्जा प्रवाह गरेको थियो ।    

संस्थाको खराब कर्जा अनुपात बढेको छ । संस्थाको खराब कर्जा अनुपात २१.३४ प्रतिशत कायम भएको छ । अघिल्लो आवमा संस्थाको खराब कर्जा अनुपात २०.९० प्रतिशत कायम थियो ।  

तेस्रो त्रैमाससम्म संस्थाको वितरणयोग्य मुनाफा २० करोड ५५ लाख रुपैयाँ रहेको छ भने लाभांश क्षमता ७०.५५ रुपैयाँ रहेको छ ।

समीक्षा अवधिसम्म संस्थाको प्रतिसेयर आम्दानी(ईपीएस)६५.०९ रुपैयाँ ,प्रतिसेयर नेटवर्थ २२०.१३ रुपैयाँ,मूल्य आम्दानी अनुपात २४.२७ गुणा ,प्रतिसेयर कुल सम्पत्तिको मूल्य १ हजार ४३९.५१ रुपैयाँ र तरलता अनुपात २३.२८ प्रतिशत कायम भएको छ ।