कालंगा र सानिगाड हाइड्रोको आईपीओ सूचीकृत, कति पायो ओपनिङ रेञ्ज ?

काठमाण्डौ । नेपाल स्टक एक्सचेञ्ज (नेप्से)मा थप दुई कम्पनीको आईपीओ सूचीकृत भएको छ । कालंगा हाइड्रो र सानिगाड हाइड्रोपावरको आईपीओ आज सूचीकृत भएको हो ।  

कालंगा हाइड्रोपावरको कुल १ करोड ४० लाख कित्ता सेयर सूचीकृत भएको हो । जसमा सर्वसाधारणलाई वितरण गरिएको ४९ लाख कित्ता सेयर र संस्थापक सेयरधनीहरुले लगानी गरेको ९१ लाख कित्ता सेयर रहेको छ ।  

त्यस्तै, सानिगाड हाइड्रोपावरको २ करोड ८५ लाख कित्ता सेयर सूचीकृत भएको हो । जसमा सर्वसाधारणले लगानी गरेको ८५ लाख ५० हजार कित्ता र संस्थापक सेयरधनीहरुले लगानी गरेको १ करोड ९९ लाख ५० हजार कित्ता सेयर रहेको छ ।  

यी दुवै कम्पनीको सेयर भोलिदेखि नै कारोबारमा आउनेछ । कालंगा हाइड्रोको आईपीओ ‘केएएचएल’ र सानिगाडको सेयर ‘एसजीएचएल’ सिम्बोलबाट सूचीकृत भएको हो ।  

नेप्सेले कालंगा हाइड्रोपावरको सेयरलाई पहिलो कारोबारको लागि ९८.५६ रुपैयाँदेखि अधिकतम २९५.६८ रुपैयाँ ओपनिङ रेञ्ज प्रदान गरेको छ भने सानिगाड हाइड्रोको आईपीओलाई १०० रुपैयाँदेखि अधिकतम ३०० रुपैयाँसम्म ओपनिङ रेञ्ज प्रदान गरेको छ ।