कामना सेवा विकास बैंकको नाफा र ईपीएस दुवै बढ्यो, कस्तो छ समग्र वित्तीय अवस्था ?

काठमाण्डौ। कामना सेवा विकास बैंक लिमिटेडले आर्थिक वर्ष २०८२/८३ को चौथो त्रैमाससम्म ८९ करोड ४१ लाख रुपैयाँ खुद नाफा आर्जन गरेको छ। यो नाफा अघिल्लो आर्थिक वर्षको सोही अवधिको ६६ करोड ९७ लाख रुपैयाँको तुलनामा ३३.५१ प्रतिशतले बढी हो।

समीक्षा अवधिमा बैंकको सञ्चालन सूचकहरूमा उल्लेखनीय सुधार देखिएको छ। बैंकको खुद ब्याज आम्दानी करिब २ अर्ब ३१ करोड रुपैयाँ कायम रहँदा खुद शुल्क तथा कमिशन आम्दानी ३१ करोड २ लाख रुपैयाँबाट बढेर ३४ करोड ८४ लाख रुपैयाँ पुगेको छ। त्यसैगरी, खुद सञ्चालन आम्दानी १८.३८ प्रतिशतले वृद्धि हुँदै २ अर्ब ७० करोड रुपैयाँ पुगेको छ।

बैंकको सञ्चालन मुनाफा पनि उल्लेखनीय रूपमा बढेको छ। अघिल्लो वर्षको सोही अवधिमा १ अर्ब ४ करोड रुपैयाँ रहेको सञ्चालन मुनाफा समीक्षा अवधिमा बढेर १ अर्ब ३८ करोड रुपैयाँ पुगेको छ।

बैंकको रिटेन्ड अर्निङ ५८ करोड ७५ लाख रुपैयाँबाट बढेर ६० करोड ११ लाख रुपैयाँ पुगेको छ। साथै, रिजर्भ कोष १ अर्ब ८३ करोड रुपैयाँबाट वृद्धि भएर २ अर्ब १४ करोड रुपैयाँ पुगेको छ।

समीक्षा अवधिसम्म बैंकले ६६ अर्ब १७ करोड रुपैयाँ निक्षेप संकलन गरेको छ भने ५४ अर्ब २१ करोड रुपैयाँ कर्जा प्रवाह गरेको जनाएको छ।

यस अवधिमा बैंकले इम्पेयरमेन्ट चार्जका लागि १३ करोड ६५ लाख रुपैयाँ व्यवस्था गरेको छ, जुन अघिल्लो वर्षको ४१ करोड ८१ लाख रुपैयाँको तुलनामा  कम हो।

यद्यपि, बैंकको खराब कर्जा (एनपीएल) अनुपात भने सामान्य रूपमा बढेको छ। अघिल्लो वर्ष ३.४९ प्रतिशत रहेको खराब कर्जा अनुपात समीक्षा अवधिमा ३.७७ प्रतिशत पुगेको छ।

बैंकको वितरणयोग्य मुनाफा पनि बढेर ६० करोड ११ लाख रुपैयाँ पुगेको छ, जुन अघिल्लो वर्ष ५८ करोड ७५ लाख रुपैयाँ थियो।

समीक्षा अवधिसम्म बैंकको ईपीएसमा सुधार आएको छ । ईपीएस १९.०८ रुपैयाँबाट बढेर २२.७५ रुपैयाँ कायम भएको छ । यस्तै प्रतिसेयर नेटवर्थ १७१.०१ रुपैयाँ, प्रतिसेयर कुल सम्पत्तिको मूल्य १ हजार ९५८.५१ रुपैयाँ, मूल्य आम्दानी अनुपात २०.८४ गुणा र तरलता अनुपात २५.१२ प्रतिशत कायम भएको छ ।