लगातार ६ दिनदेखि बढिरहेको सेयरबजारमा आज ब्रेक, जानकार भन्छन्, ‘ठूला लगानीकर्ताहरु अझै पनि पर्ख र हेरको अवस्थामा’

काठमाण्डौ । लगातार ६ दिनदेखि बढिरहेको सेयरबजारको वृद्धिमा आज ब्रेक लागेको छ । आजको कारोबारमा नेपाल स्टक एक्सचेञ्ज (नेप्से) परिसूचक ०.५१ प्रतिशत अर्थात १३.९५ अंकले घटेर २ हजार ७१२.५४ विन्दुमा ओर्लिएको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.४४ प्रतिशतले बढेर ४७०.३१ विन्दुमा सीमित बनेको छ।

आज नेप्सेमा सूचीकृत ३४६ वटा स्क्रिप्टको १ करोड १३ लाख ६२ हजार ४६५ कित्ता सेयर किनबेच हुँदा कुल कारोबार रकम ५ अर्ब १८ करोड ७४ लाख बढीको सेयर कारोबार भएको छ । अघिल्लो दिन भने ६ अर्ब ६७ करोड १० लाख बढीको सेयर कारोबार भएको थियो ।

आजको बजारबारे बजार जानकार बजार जानकार खोमनाथ प्याकुरेल भन्छन्, ‘नयाँ सरकार आएपछि बजार घटेर तल्लो विन्दुमा आएको थियो । सरकारको गतिविधि र धरपकडका कारण लगानीकर्ताहरुको कन्फिडेन्ट घटेको अवस्था थियो । प्रोमोटरहरुले पनि धमाधम सेयर बेच्दा बजारमा बिक्री दबाब सिर्जना भई मार्केट घटेको अवस्था थियो । तर केही दिनअघि मात्रै प्रधामन्त्रीको कार्यालय र ब्रोकर एसोसियसन, एफएनसीसीआई र लगानीकर्ताहरुबीच भएको छलफलपछि बजारमा केही प्रतिशत पोजेटिभ सेन्टिमेन्ट देखिएको छ ।’

उनले थपे, ‘लगानीकर्ताहरुमा थोरै पनि मनोबल बढेको देखिएको छ । तर अझैपनि बजारमा ठूलो रकम आउन सकिरहेको छैन । सरकारले पूँजीबजार चलायमान बनाउन ठूला लगानीकर्तालाई सहज तरिकाले बजारमा लगानी गर्न पाउने वातावरण सिर्जना गर्नुपर्छ । अहिले बजारको लागि सिजन भएपछि अपेक्षित कारोबार हुन सकिरहेको छैन । व्यवसायी वा ठूला लगानीकर्ताहरु अझै पनि पर्ख र हेरको अवस्थामा छन् । साना लगानीकर्ता वा ट्रेडरहरु मात्रै बजारमा सक्रिय भएकाले केही दिनयता बढेको बजारमा आज नाफा बुक भएको छ । अब एकदुई दिन बजार साईडवेजमै बस्ने देखिन्छ । सम्भवतः अर्को सातादेखि बजारमा भोल्युमसँगै नेप्से इन्डेक्स पनि माथि उक्लिने देखिन्छ ।’

कुन समूहमा भयो कतिको थपघट ?

आज कारोबारमा आएका १३ वटा समूहमध्ये २ वटा बाहेक अन्य सबै समूहमा रातो पोतियो । आज फाइनान्स र उत्पादन तथा प्रशोधन समूह मात्रै बढे । यी समूहहरु क्रमशः ०.४९ र ०.४५ प्रतिशतले बढे ।

आज व्यापार समूह सर्वाधिक घट्यो । यो समूह आज २.६० प्रतिशतले घट्यो । यस्तै बैंकिङ समूह ०.२७, विकास बैंक ०.२४, होटल ०.३१, हाईड्रो ०.५७, लगानी ०.५०, जीवन बीमा ०.६५, लघुवित्त ०.४२, म्युचुअल फण्ड ०.०७, निर्जीवन बीमा १.२६ र अन्य ०.९८ प्रतिशतले घट्यो ।  

सर्वाधिक कारोबार हुने कम्पनी

आज रिडी पावर कम्पनीको सर्वाधिक सेयर कारोबार भयो । यो कम्पनीको आज ४२ करोड ३० लाख बढीको सेयर कारोबार भयो । यस्तै एनआरएन इन्फ्रास्ट्रक्चरको २८ करोड १० लाख, रिलायन्स स्पीनिङ मिल्सको २६ करोड ३२ लाख र आँखुखोला जलविद्युतको २३ करोड २० लाख बढीको कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरुमध्ये एउटा मात्रै कम्पनीको सेयरमूल्यमा अपर सर्किट लाग्यो । आज एभरेष्ट कलर लिमिटेडको सेयरमूल्यमा मात्रै अपर सर्किट लाग्यो ।

यस्तै बुङ्गल हाईड्रोको सेयरमूल्य १०.५० प्रतिशत, सालपा विकास बैंकको ५.९२, पियोर इनर्जीको ५.२३ र श्रीनगर एग्रीटेकको सेयरमूल्य ४.३२ प्रतिशतले बढ्यो ।

यो दिन गार्डियन माइक्रो इन्स्योरेन्सको सेयरमूल्य सर्वाधिक अर्थात ३.९२ प्रतिशतले घट्यो ।