करेक्सनपश्चात आज फेरि बढ्यो सेयरबजार, ‘प्रधानमन्त्रीको आश्वासनले लगानीकर्तामा उत्साह थपिँदै’

काठमाण्डौ । अघिल्लो दिनको करेक्सनपश्चात आज सेयरबजार दोहोरो अंकले बढेको छ । आजको कारोबारमा नेपाल स्टक एक्सचेञ्ज (नेप्से) परिसूचक ०.५२ प्रतिशत अर्थात १४.१७ अंकले बढेर २ हजार ७२६.७२ विन्दुमा पुगेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.२१ प्रतिशतले बढेर ४७१.३० विन्दुमा पुगेको छ ।

आज नेप्सेमा सूचीकृत ३३८ वटा स्क्रिप्टको १ करोड ७७ हजार २२२ कित्ता सेयर किनबेच हुँदा कुल कारोबार रकम ४ अर्ब ६९ करोड ३४ लाख बढीको सेयर कारोबार भएको छ । अघिल्लो दिन भने ५ अर्ब १८ करोड ७४ लाख बढीको सेयर कारोबार भएको थियो ।

आजको बजारबारे बजार जानकार बिरेन्द्र विष्ट भन्छन्, ‘पछिल्लो समय लगानीकर्ताहरुको मनोबल बढेको अवस्था छ । प्रधानमन्त्री बालेन शाहले अर्थतन्त्र सुधार्ने विषयलाई सम्बोधन गर्दा लगानीकर्ताहरु उत्साहित छन् । अर्थमन्त्रीसँग लगानीकर्ता खासै विश्वस्त छैनन्, तर प्रधानमन्त्रीले पर्यटन व्यवसायी वा घरजग्गा कारोबारलाई चलायमान बनाउन विभिन्न व्यवसायीहरुसँग छलफल गर्नुभएको छ ।’

उनले थपे, ‘साथै लगानीकर्ताको विषय समेत सम्बोधन गर्ने आश्वासन दिनुभएको छ । अब अर्थतन्त्र राम्रै हुन्छ भन्ने लगानीकर्ताको विश्वास छ । केही दिनयता यहि कारणले नै लगानीकर्तामा मनोबल वृद्धि भएको छ । अब पूँजीबजार समेत विस्तारै राम्रै हुँदै जान्छ भन्ने सेयर लगानीकर्ताहरुको विश्वास छ ।’

कुन समूहमा भयो कतिको थपघट ?

आज कारोबारमा आएका १३ वटा समूहमध्ये २ वटा बाहेक अन्य सबै समूहमा हरियाली छायो । आज व्यापार समूह सर्वाधिक बढ्यो । यो समूह आज २.५८ प्रतिशतले बढ्यो । यस्तै बैंकिङ समूह ०.३८ प्रतिशत, विकास बेंक ०.७४, फाइनान्स ०.२७, होटल ०.९९, हाईड्रो १.१२, जीवन बीमा ०.२९, उत्पादन तथा प्रशोधन ०.३१, लघुवित्त ०.१३, म्युचुअल फण्ड ०.५३ र निर्जीवन बीमा ०.६४ प्रतिशतले बढ्यो ।

आज लगानी र अन्य समूह मात्रै घट्यो । यी समूहहरु क्रमशः ०.४२ र ०.०८ प्रतिशतले घटे ।

सर्वाधिक कारोबार हुने कम्पनी

आज रिलायन्स स्पीनिङ मिल्सको सर्वाधिक सेयर कारोबार भयो । यो कम्पनीको आज २८ करोड ३३ लाख बढीको सेयर कारोबार भयो । यस्तै आँखुखोला जलविद्युतको २७ करोड ५२ लाख,रिडी पावरको २४ करोड ९२ लाख, सोलु हाईड्रोको १७ करोड १९ लाख र इन्फ्रास्ट्रक्चरको १६ करोड २४ लाख बढीको कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरुमध्ये एउटा मात्रै कम्पनीको सेयरमूल्यमा अपर सर्किट लाग्यो । आज एभरेष्ट कलर लिमिटेडको सेयरमूल्यमा मात्रै अपर सर्किट लाग्यो ।

यस्तै स्नो रिभर्सको सेयरमूल्य १३.७१ प्रतिशत, एपोलो हाईड्रोको ११.०४ र शिखर पावर डेभलपमेन्टको सेयरमूल्य ८.४६ प्रतिशतले बढ्यो ।

यो दिन कुथेली बुखरी स्मल हाईड्रोको सेयरमूल्य सर्वाधिक अर्थात १५ प्रतिशतले घट्दै लोवर सर्किट लाग्यो । यस्तै बुङ्गल हाईड्रोको सेयरमूल्य ९.९३ र रिलायन्स स्पीनिङ मिल्सको सेयरमूल्य ४.४८ प्रतिशतले घट्यो ।