निर्जीवन बीमा बजारमा नवीन उत्पादन विस्तार, साइबरदेखि ड्रोनसम्मको बीमालेख सञ्चालन गर्न अनुमति

काठमाण्डौ । नेपाल बीमा प्राधिकरणले निर्जीवन बीमा बजारमा नवीन प्रकृतिका बीमा योजनालाई प्रोत्साहन गर्दै तीन बीमा कम्पनीका चार नयाँ बीमालेख सञ्चालनका लागि स्वीकृति दिएको छ ।  

प्राधिकरणले निर्माण, पर्यटन, साइबर जोखिम तथा ड्रोनसँग सम्बन्धित बीमालेख सञ्चालन गर्न आइजीआई प्रुडेन्सियल, शिखर इन्स्योरेन्स र सगरमाथा लुम्बिनी इन्स्योरेन्सलाई अनुमति दिएको छ ।  

प्राधिकरणबाट आईजीआई प्रुडेन्सियल इन्स्योरेन्सले निर्माण क्षेत्रका लागि ‘प्रोफेसनल इन्डेम्निटी इन्स्योरेन्स फर कन्स्ट्रक्सन प्रोजेक्ट्स’ र पर्यटन उद्योगलाई लक्षित ‘टुरिजम पोलिसी’ सञ्चालन गर्ने अनुमति पाएको छ ।  

निर्माण आयोजनामा प्राविधिक त्रुटि वा पेशागत लापरबाहीबाट उत्पन्न हुन सक्ने दायित्व तथा पर्यटन व्यवसायसँग सम्बन्धित विभिन्न जोखिमलाई बीमाको दायरामा ल्याउने उद्देश्यले यी बीमालेख स्वीकृत गरिएको जनाइएको छ ।

त्यस्तै, शिखर इन्स्योरेन्सले ‘शिखर साइबर इन्स्योरेन्स’ सञ्चालनका लागि प्राधिकरणको स्वीकृति प्राप्त गरेको छ । डिजिटल प्रविधिको प्रयोगसँगै साइबर आक्रमण, डाटा चुहावट तथा अन्य साइबर जोखिम बढिरहेका बेला कम्पनीले यस्तो बीमा योजना ल्याउन लागेको हो ।  

यसअघि नेपाल इन्स्योरेन्सले पनि साइबर जोखिम बीमा बजारमा ल्याएको भए पनि त्यसले अपेक्षाअनुसार बजार विस्तार गर्न सकेको थिएन । नयाँ उत्पादनले साइबर सुरक्षाप्रति व्यवसाय तथा संस्थाहरूको बढ्दो चासोलाई सम्बोधन गर्ने अपेक्षा गरिएको छ ।

त्यस्तै, सगरमाथा लुम्बिनी इन्स्योरेन्सले ‘ड्रोन बीमालेख’ सञ्चालनको अनुमति पाएको छ । यस बीमालेखअन्तर्गत ड्रोनमा हुने दुर्घटना, चोरी तथा अन्य क्षतिका साथै ड्रोन सञ्चालनका क्रममा तेस्रो पक्षलाई पुग्न सक्ने क्षतिको समेत रक्षावरण गरिनेछ ।

हाल नेपालमा श्रव्यदृश्य सामग्री निर्माण, समाचार संकलन, कृषि, पूर्वाधार निरीक्षण तथा विभिन्न सार्वजनिक कार्यक्रमहरूमा ड्रोनको प्रयोग तीव्र रूपमा बढ्दै गएको छ । यस्तो अवस्थामा ड्रोनसँग सम्बन्धित जोखिम व्यवस्थापनका लागि बीमा आवश्यक बन्दै गएको भन्दै प्राधिकरणले नयाँ बीमालेख स्वीकृत गरेको जनाएको छ ।

नयाँ बीमालेखहरूको स्वीकृतिसँगै नेपालको निर्जीवन बीमा बजारमा परम्परागत मोटर, सम्पत्ति र अग्नि बीमाभन्दा बाहिरका विशेषीकृत जोखिमलाई समेट्ने उत्पादन विस्तार हुने अपेक्षा गरिएको छ ।