घटेर २७ सय विन्दु तल झर्यो सेयरबजार, कारोबार रकम पनि खुम्चियो

काठमाण्डौ । मंगलबारको कारोबारमा पनि सेयरबजारमा गिरावट आएको छ । आज नेपाल स्टक एक्सचेञ्ज (नेप्से) परिसूचक ०.१७ प्रतिशत अर्थात ४.६४ अंकले घटेर २ हजार ६९६.६७ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.१४ प्रतिशतले घटेर ४७०.७९ विन्दुमा झरेको छ ।

आज नेप्सेमा सूचीकृत ३४२ वटा स्क्रिप्टको १ करोड ४ लाख २१ हजार ८६३ कित्ता सेयर किनबेच हुँदा कुल कारोबार रकम ४ अर्ब ४२ करोड ७३ लाख बढीको सेयर कारोबार भएको छ । अघिल्लो दिन भने ६ अर्ब २६ करोड बढीको सेयर कारोबार भएको थियो ।

आजको बजारबारे बजार जानकार तथा प्राविधिक विश्लेषक अजयसिं थापा (जय शम्भु) भन्छन्, ‘अहिले बजारमा खासै केही परिवर्तन छैन, मार्केट बढ्ने सिजन भएपनि बजारले लय लिन सकिरहेको छैन । पोहोर असार महिनामा १० अर्बमाथिको भोल्युम आएको थियो तर यस वर्ष बजारमा जम्मा ४–५ अर्बको कारोबार सीमित छ । यस हिसाबमा पनि बजारमा लगानीकर्ता आएका छैनन् वा ठूलो भोल्युम ल्याउने लगानीकर्ता मार्केटमा सक्रिय छैनन् भन्ने बुझिन्छ । जबसम्म बजारमा भोल्युम बढ्दैन तबसम्म बजार सस्टेन हुने देखिदैन ।’

उनले थपे, ‘साना लगानीकर्ताले मात्रै बजार धान्न गाह्रो छ । यो सिजन बजार घट्ने धेरै सम्भावना छ । केहीगरी ‘गुड न्युज’ आइहाले पनि १००–१५० अंकले बजार बढ्ला तर ३ हजारको आसपास बजार पुग्न अब असम्भव नै छ । बजारमा अब ठूलो र्याली आउने सम्भावना न्यून छ । अझैपनि ठूला लगानीकर्ता बजार प्रवेश नगर्ने हो भने बजारले २४ सयको लो बटन ब्रेक गर्ने सम्भावना रहन्छ ।’

कुन समूहमा भयो कतिको थपघट ?

आज कारोबारमा आएका १३ वटा समूहमध्ये चारवटा बाहेक अन्य सबैमा रातो पोतियो । आज व्यापार समूह सर्वाधिक अर्थात ०.७४ प्रतिशतले बढ्यो । यस्तै फाइनान्स ०.०६, होटल ०.१८ र हाईड्रो ०.१५ प्रतिशतले बढ्यो ।

अन्य समूह आज सर्वाधिक अर्थात ०.८० प्रतिशतले घट्यो । यस्तै बैंकिङ समूह ०.०७ प्रतिशत, विकास बैंक समूह ०.१९, लगानी ०.७९, जीवन बीमा ०.५८, उत्पादन तथा प्रशोधन ०.२६, लघुवित्त ०.१३, म्युचुअल फण्ड ०.४६ र निर्जीवन बीमा ०.२४ प्रतिशतले घट्यो ।

सर्वाधिक कारोबार हुने कम्पनी

आज सेन्ट्रल फाइनान्सको सर्वाधिक सेयर कारोबार भयो । यो कम्पनीको आज २७ करोड १४ लाख बढीको सेयर कारोबार भयो । यस्तै सिडी पावरको २१ करोड २१ लाख, सोलु हाईड्रोको १९ करोड ९ लाख, ग्लोबल आइएमई बैंकको १६ करोड ७८ लाख र रिलायन्स स्पीनिङ मिल्सको १६ करोड १३ लाख बढीको कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरुमध्ये एउटा मात्रै कम्पनीको सेयरमूल्यमा अपर सर्किट लाग्यो । आज एभरेष्ट कलर लिमिटेडको सेयरमूल्यमा मात्रै अपर सर्किट लाग्यो ।

यस्तै लक्ष्मी उन्नती कोषको मूल्य ९.१० प्रतिशत, गरिमा समृद्धि योजनाको ५.९८ र याम्बालिङ हाईड्रोको मूल्य ४.३९ प्रतिशतले बढ्यो ।

यो दिन कुथेली बुखरी स्मल हाईड्रोको सेयरमूल्य सर्वाधिक अर्थात ६.०७ प्रतिशतले घट्यो ।