प्रिमियममा आईपीओ ल्याउन लागेको हुलास फिनसर्भको उत्कृष्ट वित्तीय प्रदर्शन, सेयर बिक्रीअघि नै लाभांश क्षमता ९३%

काठमाण्डौ । प्रिमियम मूल्यमा आईपीओ निष्कासनको तयारीमा रहेको हुलास फिनसर्भ हायर पर्चेज लिमिटेडको वित्तीय प्रदर्शन उत्कृष्ट देखिएको छ ।  

गत आर्थिक वर्ष २०८२/८३ मा कम्पनीले ३९ करोड ८७ लाख रुपैयाँ नाफा कमाएको छ । यो नाफा अघिल्लो आर्थिक वर्ष २०८/८२ को तुलनामा ८४.४५ प्रतिशत बढी हो । अघिल्ल्लो आवमा कम्पनीले २१ करोड ६१ लाख रुपैयाँ नाफा कमाएको थियो ।  

कम्पनीको खुद ब्याज आम्दानीमा सुधार देखिएसँगै नाफामा सुधार देखिएको हो । गत आवमा कम्पनीले ४८ करोड ४६ लाख रुपैयाँ खुद ब्याज आम्दानी गरेको छ । यो आम्दानी अघिल्लो आवको तुलनामा ११९.२८ प्रतिशत बढी हो । अघिल्लो आवमा कम्पनीले २२ करोड १० लाख रुपैयाँ खुद ब्याज आम्दानी गरेको थियो ।  

साथै कम्पनीको इम्पेयरमेन्ट चार्जमा आएको सुधारले नाफा वृद्धिमा थप टेवा पुगेको छ । अघिल्लो आर्थिक वर्षमा ६ करोड ९ लाख रुपैयाँ इम्पेयरमेन्ट चार्ज तिरेको यो कम्पनीले गत आवमा भने ५ करोड रुपैयाँ मात्रै यस्तो चार्ज तिरेको छ ।  

८३ करोड रुपैयाँ चुक्तापूँजी रहेको यो कम्पनीको रिजर्भमा २८ करोड ३८ लाख रुपैयाँ संचित रहेको छ भने रिटेन्ड अर्निङमा ७७ करोड ४० लाख रुपैयाँ संचित रहेकोछ ।  

अन्य सूचकहरु सकारात्मक देखिएपनि कम्पनीको दायित्व भने चुलिएको छ । अघिल्लो आवमा ६ अर्ब ९४ करोड ४३ लाख रुपैयाँ दायित्व रहेको यो कम्पनीको गत आवमा भने ५३.७२ प्रतिशतले बढेर १० अर्ब ७५ करोड १३ लाख रुपैयाँ पुगेको छ ।  

साथै कम्पनीको प्रतिसेयर आम्दानी (इपीएस) २६.०४ रुपैयाँबाट बढेर ४८.०४ रुपैयाँ पुगेको छ भने प्रतिसेयर नेटवर्थ २२७.४६ रुपैयाँ, एनपीएल ३.४० प्रतिशतबाट घटेर १.८७ प्रतिशत, कस्ट अफ फण्ड ५.७७ प्रतिशत र स्प्रेड दर ३.३९ प्रतिशत रहेको छ ।  

कम्पनीको वितरणयोग्य मुनाफा भने ७०.०९ प्रतिशतले वृद्धि भएको छ । अघिल्लो आवमा ४५ करोड ५० लाख रुपैयाँ मात्रै वितरणयोग्य मुनाफा छुट्याएको यस कम्पनीले गत आवमा भने ७७ करोड ४० लाख रुपैयाँ छुट्याएको छ । यसर्थमा कम्पनीको आईपीओ निष्कासन अघि नै लाभांश क्षमता भने ९३.२६ प्रतिशत रहेको छ ।  

नेपाल राष्ट्र बैंकबाट हायर पर्चेच कर्जा लगानी गर्न इजाजत पत्र प्राप्त यस कम्पनीले ७४ करोड ४६ लाख रुपैयाँ बराबरको आईपीओ निष्कासन गर्न नेपाल धितोपत्र बोर्ड (सेबोन)सँग अनुमति मागेको छ ।

कम्पनीले अंकित मूल्य १०० रुपैयाँमा २५८.८५ रुपैयाँ प्रिमियम थप गरी प्रतिकित्ता ३५८.८५ रुपैयाँ दरमा २० लाख ७५ हजार कित्ता सेयर निष्कासन गर्न बोर्डसँग अनुमति मागेको हो । कम्पनीको बिक्री प्रबन्धकमा भने एनएमबि क्यापिटल लिमिटेड रहेको छ ।