विद्युत बिक्री आम्दानी बढेसँगै स्नो रिभर्सको खुद नाफा २४१ प्रतिशतले वृद्धि, ईपीएस १४.२१ रुपैयाँ पुग्यो

काठमाण्डौ । हालै आईपीओ निष्कासन गरेको स्नो रिभर्स लिमिटेडको गत आर्थिक वर्षको अपरिष्कृत वित्तीय विवरण सार्वजनिक भएको छ । प्रकाशित वित्तीय विवरणअनुसार कम्पनी वित्तीय अवस्था राम्रो देखिएको छ ।

कम्पनीले नाफा आर्जन, आम्दानी र ईपीएस वृद्धिमा सफलता हासिल गरेको छ भने खर्च बढ्नु कम्पनीका लागि चुनौतीका रुपमा देखिएको छ । कम्पनीले समीक्षा अवधिमा ११ करोड १८ लाख रुपैयाँबराबरको खुद नाफा आर्जन गरेको छ । यो रकम अघिल्लो आवको सोही अवधिको तुलनामा २४१.५० प्रतिशतले बढी हो । अघिल्लो आवको चौथो त्रैमाससम्म भने कम्पनीको खुद नाफा ३ करोड २७ लाखमा सीमित थियो ।

विद्युत बिक्री आम्दानी बढ्दा कम्पनीको खुद नाफामा सुधार आएको हो । कम्पनीको विद्युत बिक्री आम्दानी १०१.९५ प्रतिशतले बढ्दै ३७ करोड ७५ लाख पुगेको छ । अघिल्लो आवको सोही अवधिसम्म भने संस्थाको विद्युत बिक्री आम्दानी १८ करोड ६९ लाख रहेको थियो ।

यो अवधिमा कम्पनीको प्रशासनिक खर्च ३८ लाखबाट बढेर ६७ लाख २९ हजार र वित्तीय खर्च ८ करोड ४० लाखबाट बढेर १३ करोड २६ लाख पुगेको छ ।

९३  करोड ७५ लाख रुपैयाँ चुक्तापूँजी भएको कम्पनीको रिजर्भ कोषमा ११ करोड ३३ लाख सञ्चित रहेको छ ।

यस्तै कम्पनीको प्रतिसेयर आम्दानी(ईपीएस) ४.३७ प्रतिशतबाट बढेर १४.२१ प्रतिशत पुगेको छ । समीक्षा अवधिसम्म कम्पनीको प्रतिसेयर नेटवर्थ ११२.०९ रुपैयाँ, प्रतिसेयर कुल सम्पत्तिको मूल्य  ३२१.६५ रुपैयाँ, मूल्य आम्दानी अनुपात ५४.८३ गुणा र तरलता अनुपात २.२५ प्रतिशत कायम भएको छ ।