आजपनि झिनो अंकले बढ्यो नेप्से, कारोबार रकम साढे ३ अर्बमा झर्यो

काठमाण्डौ । बुधबारको कारोबारमा सेयरबजार झिनो अंकले बढेको छ । आज नेपाल स्टक एक्सचेञ्ज (नेप्से) परिसूचक ०.०२ प्रतिशत अर्थात ०.५५ अंकले बढेर २ हजार ६४२.४० विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.३० प्रतिशतले बढेर ४६३.६१ विन्दुमा पुगेको छ ।

आज नेप्सेमा सूचीकृत ३४८ वटा स्क्रिप्टको ८७ लाख १ हजार ९४४ कित्ता सेयर किनबेच हुँदा कुल कारोबार रकम ३ अर्ब ५३ करोड २१ लाख बढीको सेयर कारोबार भएको छ । अघिल्लो दिन भने ४ अर्ब ११ करोड ९ लाख बढीको सेयर कारोबार भएको थियो ।

आजको बजारबारे नेपाल धितोपत्र लगानीकर्ता संघका अध्यक्ष हरि केसी भन्छन्, ‘पछिल्लो समय बजार सस्टेन हुन नसक्नुमा मुख्यगरी सरकार र सम्बन्धित निकायहरुको कमजोरी छ । सेयर लगानीकर्तालाई भरोसा दिलाउनउ नसक्दा पूँजीबजारले गति लिन सकेको छैन, जसकारण सरकार आफैंलाई पनि घाटा छ । अहिले लगानीकर्ताहरुले नेपाल धितोपत्र बोर्ड र सरकारबाट आश्वासन खोजिरहेका छन् । तर बोर्डले भरोसा दिलाउन नसक्दा बजारमा थप लगानी भित्रिन सकेको छैन । सेबोनका अध्यक्षप्रति लगानीकर्ताको विश्वास विस्तारै हराउँदै गएको छ ।’

उनले थपे, ‘पब्लिसिटीमा बढी फोकस र परिणाममा शुन्यता देखिदा नयाँ अध्यक्षप्रतिको विश्वास गुम्दै गएको छ । त्यसमाथि अहिले बोर्ड सर्ट सेलिङ र इन्ट्रा डे मा बढी फोकस भएको छ यदि बजारमा यो व्यवस्था आयो भने तिहारमा पटका पड्काएको जस्तो मात्रै हुन्छ, प्रभाव खासै देखिदैन । अहिले सेयर लगानीकर्ताहरु पनि दोस्रो बजार भन्दा बढी प्रि–आईपीओतिर बढी पैसा खन्याइरहेका छन्, जसकारण बजारमा भोल्युम बढ्न सकिरहेको छैन ।’

कुन समूहमा भयो कतिको थपघट ?

आज कारोबारमा आएका १३ वटै समूहमध्ये ५ वटामा हरियाली छायो भने ८ वटामा रातो पोतियो । आज लगानी समूह सर्वाधिक अर्थात २.२१ प्रतिशतले बढ्यो । यस्तै बैंकिङ समूह ०.०५ प्रतिशत, फाइनान्स ०.२४, होटल ०.८५ र म्युचुअल फण्ड ०.२९ प्रतिशतले बढ्यो ।  

यो दिन उत्पादन तथा प्रशोधन समूह सर्वाधिक अर्थात ०.७० प्रतिशतले घट्यो । यस्तै विकास बैंक समूह ०.२२ प्रतिशत, हाईड्रो ०.४०, जीवन बीमा ०.१५, लघुवित्त ०.०५, निर्जीवन बीमा ०.०५, अन्य ०.१० र व्यापार ०.२१ प्रतिशतले घट्यो ।

सर्वाधिक कारोबार हुने कम्पनी

आज एनआरएन इन्फ्रास्ट्रक्चरको सर्वाधिक सेयर कारोबार भयो । यो कम्पनीको आज ३१ करोड ६० लाख बढीको सेयर कारोबार भयो । यस्तै सेन्ट्रल फाइनान्सको २२ करोड ४८ लाख, सोलु हाईड्रोको २२ करोड ६ लाख र खानीखोला हाईड्रोको १० करोड ९९ लाख बढीको सेयर कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरु मध्ये माउन्ट एभरेष्ट पावर डेभलपमेन्टको सेयरमूल्यमा मात्रै अपर सर्किट लाग्यो । यस्तै आज इमर्जिङ नेपाल लिमिटेडको सेयरमूल्य ५.४८ प्रतिशत, एचआईडीसीएलको ४.९५ र सानीमा लार्ज क्याप फण्डको मूल्य ४.१८ प्रतिशतले बढ्यो ।  

यो दिन अप्पर लोहरेखोला हाईड्रोको सेयरमूल्य सर्वाधिक अर्थात १४.९८ प्रतिशतले घट्यो । महिला लघुवित्तको सेयरमूल्य पनि आज ५.१८ प्रतिशत र कर्पोरेट डेभलपमेन्ट बैंकको सेयरमूल्य ४.७४ प्रतिशतले घट्यो ।